Megjithëse shumica e udhëzimeve mjekësore rekomandojnë mamografi deri në moshën 74-vjeç, kërkime të reja sugjerojnë se ekzaminimet mund të jenë të vlefshme edhe për gratë në të 80-at, duke zbuluar kancerin e gjirit më herët dhe duke rritur shanset për mbijetesë.
Studimi i botuar në “Annals of Surgical Oncology”, shqyrtoi të dhënat mjekësore të 174 grave mbi 80-vjeç të trajtuara për kancer gjiri në Universitetin e Kalifornisë, Los Anxhelos midis viteve 2013–2020.
Gratë që kishin bërë mamografi brenda dy viteve para diagnozës kishin më shumë gjasa të zbulonin kancer në fazë të hershme dhe të kishin rezultate më të mira. Ato që nuk ishin kontrolluar rregullisht shpesh diagnostikoheshin me tumore më të mëdha ose më të avancuara, shkruan Health Day transmeton Gazeta Shneta.
Gjatë një ndjekjeje mesatare prej 55 muajsh, gratë e kontrolluara kishin 55% rrezik më të ulët që kanceri të rikthehej dhe 74% rrezik më të ulët vdekjeje krahasuar me ato që nuk kishin bërë mamografi të fundit.
Po ashtu, ato kishin më shumë gjasa t’i nënshtroheshin kirurgjisë për heqjen e tumorit, ndërsa disa gra pa ekzaminime e shmangën operacionin.
Kanceri i gjirit mbetet forma më e zakonshme e kancerit tek gratë e moshuara, por udhëzimet mbi moshën kur duhet ndalur skriningu mbeten të paqarta.
Rezultatet e këtij studimi sugjerojnë se mosha e avancuar nuk duhet të jetë arsye për të përjashtuar mamografitë, përveç rasteve kur ka probleme të tjera më urgjente shëndetësore.
Megjithëse nevojiten studime më të mëdha, këto gjetje ofrojnë prova se mamografitë e rregullta edhe pas të 80-ave mund të ndihmojnë në diagnostikim më të hershëm dhe jetëgjatësi më të madhe. /Gazeta Shneta/