Numri i njerëzve që jetojnë me çrregullime të shëndetit mendor pothuajse është dyfishuar gjatë 30 viteve të fundit, kryesisht për shkak të rritjes së ndjeshme të rasteve me ankth dhe depresion në mbarë botën.
Sipas një studimi të publikuar në revistën mjekësore “The Lancet”, rreth 1.2 miliardë njerëz kanë jetuar me një çrregullim të shëndetit mendor gjatë vitit 2023, raporton Euronews Health transmeton Gazeta Shneta.
Studimi, pjesë e “Global Burden of Disease Study 2023”, tregon se rastet e depresionit të rëndë janë rritur me 131%, ndërsa çrregullimet e ankthit me 158% krahasuar me vitin 1990. Këto dy gjendje konsiderohen sot si problemet më të zakonshme të shëndetit mendor në nivel global.
Autorët e raportit paralajmërojnë se sëmundjet mendore po shkaktojnë vuajtje të mëdha njerëzore dhe humbje afatgjata të shëndetit, duke ndikuar jo vetëm individët, por edhe familjet, vendet e punës dhe ekonomitë shtetërore.
Ata theksojnë se ulja e produktivitetit dhe presioni në rritje mbi sistemet shëndetësore dhe sociale janë bërë një sfidë globale.
Raporti tregon se gratë preken më shumë nga depresioni dhe ankthi sesa burrat, ndërsa çrregullimet neurozhvillimore dhe të sjelljes, si ADHD dhe autizmi, janë më të zakonshme tek meshkujt.
Faktorët që ndikojnë përfshijnë dhunën në familje, abuzimin seksual, diskriminimin gjinor dhe pabarazitë sociale.
Barrën më të lartë të problemeve mendore e mbajnë adoleshentët e moshës 15 deri në 19 vjeç, duke nxjerrë në pah nevojën për mbështetje dhe parandalim të hershëm.
Studiuesit paralajmërojnë se shërbimet e shëndetit mendor nuk po zgjerohen me të njëjtin ritëm me rritjen e nevojave globale. /Gazeta Shneta/