Organizata Botërore e Shëndetësisë ka ngritur nivelin e rrezikut publik nga shpërthimi i Ebolës në Republikën Demokratike të Kongos nga “i lartë” në “shumë i lartë”.
Drejtori i përgjithshëm i OBSH-së, Tedros Adhanom Ghebreyesus, deklaroi se deri tani janë konfirmuar 82 raste dhe shtatë viktima në vend, por paralajmëroi se situata reale mund të jetë shumë më serioze, raporton Euroneës Health transmeton Gazeta Shneta.
Sipas tij, ekzistojnë rreth 750 raste të dyshuara dhe 177 vdekje të dyshuara, çka tregon se epidemia po përhapet më shumë sesa raportet zyrtare fillestare.
Megjithatë, OBSH theksoi se rreziku global nga kjo sëmundje mbetet ende i ulët.
Shpërthimi aktual është shkaktuar nga varianti i rrallë Bundibugyo i virusit Ebola, për të cilin ende nuk ekziston një vaksinë e provuar. Virusi është përhapur edhe në Ugandën fqinje, ku janë konfirmuar dy raste dhe një viktimë.
Një shtetas amerikan që punonte në Republikën Demokratike të Kongos rezultoi pozitiv me Ebola dhe u transferua këtë javë për trajtim në spitalin Charité në Berlin.
Spitali bëri të ditur se pacienti ndodhet në gjendje të dobësuar, por jo kritike. Ai po mbahet nën mbikëqyrje të vazhdueshme në një njësi të specializuar izolimi me siguri të lartë.
OBSH njoftoi gjithashtu se një tjetër shtetas amerikan, i konsideruar kontakt me rrezik të lartë, është transferuar në Republikën Çeke.
Ndërkohë, në Holandë, një pacient i dyshuar për Ebola është izoluar në pritje të rezultateve diagnostikuese.
Ebola është një sëmundje e rëndë dhe shpesh vdekjeprurëse, e identifikuar për herë të parë në vitin 1976. Simptomat përfshijnë temperaturë, dobësi, diarre dhe të vjella. /Gazeta Shneta/