Në Shërbimin Spitalor Klinik Universitar të Kosovës, për tre muaj janë kryer 10 mijë e 807 operacione. Në raportin e punës për muajt janar-mars, janë regjistruar 1.8 milion shërbime, ndërsa mbi 38 mijë pacientë kanë qenë të shtrirë brenda kësaj periudhe. Numri i shërbimeve të dializës ka arritur mbi 29 mijë ndërsa shfrytëzimi i kapaciteteve është 61 %.
“Sfidues ishte sidomos çështje e pamundësitë buxhetore për të realizuar të gjitha kërkesat që bënë njësitë përbërëse të SHSKUK-së, meqë kishte buxhet të vogël dhe duhej të koncentroheshim kryesisht tek kërkesat urgjente dhe ato më të domosdoshme”, thuhet në raportin e punës, shkruan Gazeta Shneta.
Tutje SHSKUK bën të ditur se përqendrimi kryesor ishte në mbarëvajtjen e shërbimeve të domosdoshme për ofrim të shërbimeve shëndetësore, sidomos në servisim dhe mirëmbajtje të aparaturave ku kishte vështirësi, meqë buxheti për këtë destinim ishte shumë më i vogël krahasuar me kërkesat reale.
Mungesa e buxhetit nuk është problemi i vetëm i SHSKUK-së. Spitalet dhe Klinikat po përballen me mungesa të shumta të barnave dhe materialeve nga Lista Esenciale. Madje furnizimi nga Ministria e Shëndetësisë nuk ka kaluar as 50 për qindëshin.
“Furnizimi me produkte mjekësore nga Lisa Esenciale në QKUK është me barëra ishte 55%, 41% me material hargjues dhe 54% me citostatik. Spitalet e Përgjithshme të Republikës së Kosovës arrijnë një mesatare të furnizimit me 46% në Barëra dhe 23% në Material shpenzues”, thuhet në raportin e SHSKUK-së. /Gazeta Shneta/