Mbi 100 persona janë prekur nga një shpërthim i norovirusit në Portugali, ndërsa autoritetet shëndetësore po hetojnë burimin e infeksionit.
Shumica e rasteve dyshohet se lidhen me një turne ndërkombëtar futbolli për të rinj, i mbajtur në qytetin Caldas da Rainha.
Departamenti i Emergjencës në spitalin e Caldas da Rainha trajtoi javën e kaluar më shumë se 60 pacientë që u paraqitën me simptoma tipike të gastroenteritit, përfshirë të vjella, diarre, të përziera, ethe, dhimbje barku dhe dhimbje koke. Pas analizave epidemiologjike, autoritetet konfirmuan se bëhej fjalë për një shpërthim të norovirusit.
Sipas autoriteteve portugeze të shëndetësisë, deri më tani janë konfirmuar mbi 100 raste, ndërsa rreth 80 prej tyre lidhen me një turne ndërkombëtar futbolli për të rinj, ku morën pjesë ekipe nga vende të ndryshme. Hetimet janë përqendruar në identifikimin e burimit të infektimit dhe mënyrës së përhapjes së virusit.
Norovirusi është një nga shkaqet më të zakonshme të gastroenteritit viral dhe përhapet lehtësisht nga personi në person, përmes ushqimit ose ujit të kontaminuar, si edhe nga sipërfaqet e ndotura. Simptomat zakonisht shfaqen brenda 12 deri në 48 orëve pas infektimit dhe zgjasin një deri në tre ditë.
Ekspertët këshillojnë larjen e shpeshtë të duarve me ujë dhe sapun, dezinfektimin e sipërfaqeve dhe izolimin e personave të sëmurë për të kufizuar përhapjen e virusit.
Gjithashtu rekomandohet konsumimi i mjaftueshëm i lëngjeve për të shmangur dehidratimin, i cili është komplikacioni më i zakonshëm, veçanërisht tek fëmijët, të moshuarit dhe personat me imunitet të dobësuar.