Vetëm 49% e pacientëve që marrin një rezultat të dyshimtë nga testi i gjakut për kancer kolorektal e kryejnë kolonoskopinë kontrolluese brenda gjashtë muajve, sipas një studimi të publikuar më 29 korrik në revistën Gastroenterology.
Studiuesit nga Universiteti i Kalifornisë, Los Anxhelos (UCLA) analizuan të dhëna administrative për 6,068 individë që kishin kryer testin “Shield” nga Guardant Health.
Vetëm 7.4% rezultuan me test abnormal, dhe ndër ta, më pak se gjysma (49%) bënë kolonoskopinë pasuese brenda afatit 6-mujor, shkruan MedicalXpress transmeton Gazeta Shneta.
Pacientët me sigurim shëndetësor Medicare Advantage kishin më pak gjasa të kryenin kolonoskopinë (me 74% më pak mundësi) krahasuar me ata me sigurim privat. Ndër faktorët që ndihmuan në ndjekjen e kolonoskopisë ishin më pak sëmundje shoqëruese, ndërsa mosha, raca dhe rajoni gjeografik nuk rezultuan ndikues.
“Marrja e një testi gjaku është vetëm hapi i parë. Pa kolonoskopinë pasuese, diagnostikimi dhe trajtimi i kancerit nuk mund të realizohet,” theksoi autorja kryesore Dr. Folasade May nga UCLA. Ajo bëri thirrje për më shumë përpjekje që pacientët të ndjekin procesin deri në fund./Gazeta Shneta/