Një studim i ri ka zbuluar se personat e moshës së mesme dhe të moshuar që përjetojnë migrenë me aurë mund të kenë një rrezik më të lartë për të pësuar goditje ishemike në tru, forma më e zakonshme e insultit cerebral.
Aura është një grup simptomash neurologjike që shfaqen para ose gjatë një krize migrene, si ndryshime në shikim, drita vezulluese ose çrregullime të tjera shqisore.
Studiuesit analizuan të dhënat e mbi 11 mijë personave mbi moshën 45 vjeç, të ndjekur për një periudhë mesatare prej 6.4 vitesh.
Rezultatet treguan se migrena në përgjithësi nuk lidhej drejtpërdrejt me rritjen e rrezikut për goditje në tru, shkruan burimi Medical News Today transmeton Gazeta Shneta.
Megjithatë, kur u analizuan llojet e migrenës, u vu re se vetëm migrena me aurë shoqërohej me një rrezik dukshëm më të lartë për insult ishemik.
Sipas studiuesve, personat me këtë formë migrene kishin 1.5 deri në 1.9 herë më shumë gjasa të pësonin goditje në tru krahasuar me ata që nuk kishin migrenë.
Një gjetje tjetër interesante ishte se burrat nën moshën 72 vjeç me histori migrene kishin rrezikun më të lartë, ndërsa tek gratë dhe burrat më të moshuar nuk u vu re një lidhje e ngjashme e fortë.
Ekspertët këshillojnë personat që kanë migrenë me aurë të monitorojnë faktorët e tjerë të rrezikut kardiovaskular, si tensioni i lartë i gjakut, diabeti, kolesteroli dhe duhanpirja, për të ulur mundësinë e komplikimeve në të ardhmen. /Gazeta Shneta/