Ministrat Arben Vitia dhe Xhelal Sveçla, kanë vazhduar qëndrimin e tyre në Kroaci ku po trajtohen të lënduarit nga aksidenti tragjik që ndodhi dje ku mbetën të vdekur 10 kosovarë.
Qeveria e Kosovës ka njoftuar se kryeministri Albin Kurti dhe zyrtarët tjerë që qëndruan dje në Kroaci, tanimë janë kthyer në Kosovë, ndërsa dy ministrat Vitia dhe Sveçla po qëndrojnë ende në Slavonski Brod.
“Në Kroaci vazhdojnë të qëndrojnë ministri i Punëve të Brendshme, Xhelal Sveçla dhe ministri i Shëndetësisë, Arben Vitia për të koordinuar tutje veprimet dhe të gjitha masat e nevojshme për kujdesin dhe trajtimin e të gjithë udhëtarëve që janë lënduar në këtë aksident tragjik”, thuhet në njoftimin e Qeverisë.
Në aksidentin e djeshëm ku u përfshi një autobus i linjës Frankfurt-Prishtinë, mbetën të vdekur 10 kosovarë. Ndërkaq 45 persona tjerë u lënduan prej të cilëve 15 në gjendje të rëndë të cilët po trajtohen në spitalin universitar të Slavonski Brod.
Në Kosovë sot është shpallur ditë zie nga Presidentja Vjosa Osmani në nderim të viktimave nga kjo tragjedi. /Gazeta Shneta/