Për herë të parë në histori është kryer operacioni i trurit në një fetus që ishte ende në mitër.
Operacioni u realizua për ta trajtuar një anomali të rrallë të enëve të gjakut që mund të rezultonte fatale për të sapolindurin, shkruan U.S.News, transmeton Gazeta Shneta.
Gazetat amerikane raportojnë se operacioni u zhvillua në javën e 34-të të shtatzënisë, nga një ekip mjekësh nga Brigham and Women’s Hospital dhe Boston Children’s Hospital.
Ky operacion është i pari në fushën e tij dhe u krye me mënyrën e zbulimit të arteries duke përdorur ultratinguj.
Mjekët përdorën ultratinguj për të drejtuar një gjilpërë të gjatë përmes barkut të nënës në pjesën e trurit të foshnjës që ishte prekur. Më pas mjekët injektuan një substancë brenda venës me qëllimin për të penguar kthimin prapa të rrjedhës në vena.
Me kryerjen e operacionit në mënyrë të suksesshme, mjekët shpëtuan foshnjën e palindur ende, nga shfaqja e sëmundjeve serioze si çrregullimet neurologjike dhe pamjaftueshmëria e zemrës që do të shkaktonin vdekjen pas lindjes.
Kjo anamoli ndodh kur arteriet e paformuara në tru bëjnë një lidhje të gabuar: në vend që të dërgojnë gjak në kapilarët më të vegjël që ushqejnë trurin dhe ngadalësojnë rrjedhën e gjakut, arteriet lidhen drejtpërdrejt me një venë të madhe që e largon gjakun nga truri dhe e dërgon përsëri në zemër.
Kjo gjendje është e rrallë, ndodh në rreth 1 në 60,000 lindje dhe shpesh zbulohet gjatë ultrazërit rutinë në fund të shtatzënisë. /Gazeta Shneta/