Ministria e Shëndetësisë ka hequr dorë nga Kontrata Kolektive e cila kishte skaduar në vitin 2021. Tevide Imeri nga FSSHK thotë se pagesat e kujdestarive sipas kësaj kontrate nuk do të ndalen.
Ud.ministrja e Shëndetësisë Dafina Gexha-Bunjaku ka marr vendim që të mos e vazhdojë Kontratën Kolektive me Federatën e Sindikatave të Shëndetësisë e nënshkruar në vitin 2018, shkruan Gazeta Shneta.
Në njoftimin që MSH i ka bërë FSSHK-së thuhet se së shpejti do të nis negocimi për kontratën e re.
“Qeveria, përkatësisht Ministria e Shëndetësisë përmes këtij njoftimi bën të ditur vullnetin për mos vazhdimin e implementimit të Kontratës Kolektive, dhe njëkohësisht së shpejti do të ju njoftojë për negocimin e kontratës së re ndërsektoriale, në pajtim me legjislacionin në fuqi dhe me rrethanat e reja të krijuara”, thuhet në letrën e Gexha-Bunjakut, drejtuar FSSHK-së.
Gexha-Bunjaku dhe kryetarja e FSSHK-së Tevide Imeri kanë pasur dy takime lidhur me këtë Kontratë.
Imeri ka thënë se disa nga benefitet që i kanë gëzuar punëtorët shëndetësorë nga kjo kontratë, nuk do të ndalen. Një prej tyre janë pagesat e kujdestarive.
“Kujdestaritë, pushimet mjekësore tek rastet e rënda, rrezikshmëritë, janë disa prej pikave që i kemi diskutuar për të mos u ndalur me shkëputjen e Kontratës Kolektive. Për këtë jemi duke punuar në një memorandum bashkëpunimi deri në nxjerrjen e kontratës së përgjithshme kolektive dhe asaj sektoriale”, ka deklaruar Imeri.
Ajo ka thënë se pagat jubilare janë marr prej të gjithë punëtorëve shëndetësor, ose janë në procedurë.
“Me këtë kontratë s’kemi mundur me i realizu padi për pagat jubilare”, ka deklaruar ajo.
Kujtojmë se me Kontratën Kolektive pagesat për kujdestari tek mjekët ishin rritur për 45 për qind, ndërsa për infermierë deri në 15 për qind. /Gazeta Shneta/