Ministria e Shëndetësisë ka njoftuar se ka pranuar rezultatin e analizave të produkteve Gensulin M 30 dhe Gensulin R.
MSH thotë se rezultati i analizave ka treguar se produkti Gensulin i përgjigjet specifikave dhe parametrave të deklaruara, transmeton Gazeta Shneta.
Ky produkt u dërgua për analiza në një laborator në Kroaci, pas kritikave nga disa endokrinologë dhe ankesave të personave me diabet për efekte anësore të produktit.
Megjithatë, Ministria nuk e ka publikuar edhe dokumentin e analizave për këtë rast.
Njoftimi i plotë i MSH-së
Laboratori Halmed i Kroacisë kryen analizën për produktin Gensulin
Sipas rezultateve zyrtare të analizave të bërë për disa mostra të këtyre dy produkteve, të cilat Laboratori “HALMED” ia ka përcjellë AKPPM-së, rezulton se parametrat e analizuar të Gensulin M 30 dhe Gensulin R, u përgjigjen të gjitha specifikave të deklaruara për parametrat e analizuar të këtyre dy produkteve
Ministria e Shëndetësisë, përkatësisht Agjensioni Kosovar për Produkte dhe Pajisje Medicinale (AKPPM) informon opinionin ka pranuar rezultatet e analizave të produktit Gensulin M 30 dhe Gensulin R nga Laboratorin për Cilësi i Agjensionit Kombëtar të Produkteve dhe Pajisjeve Mjekësore “HALMED” Zagreb-Kroaci, të cilat u dërguan kohë më parë për analiza, pas disa shqetësimeve të ngritura lidhur me këtë produkt nga disa endokrinologë kosovarë, kryesisht në media, për siç konsideronin ata, “efekte jo adekuate të produktit Gensulin”.
Sipas rezultateve zyrtare të analizave të bërë për disa mostra të këtyre dy produkteve, të cilat Laboratori Zyrtar për Cilësi “HALMED” ia ka përcjellë AKPPM-së, rezulton se parametrat e analizuar të Gensulin M 30 dhe Gensulin R (vizualiteti, pastërtia, Ph, identifikimi i HPLC, përmbajtja e HPLC, steriliteti, endotoksinat bakteriale, etj.) u përgjigjen të gjitha specifikave të deklaruara për parametrat e analizuar të këtyre dy produkteve, përkatësisht rezultatet janë brenda standardeve të parametrave të analizuar.
Siç dihet, mostrat e produktit Gensulin, u dërguan në qershor nga Inspektorati Farmaceutik i MSh-së dhe AKPPM, për analizë në Zagreb, me qëllim që qytetarët, publiku dhe në veçanti pacientët me diabet të sigurohen se MSh ka ndërmarrë masa për të siguruar që ilaçet që përdoret t’i plotësojnë standardet e cilësisë.
Duke informuar për rezultatet e këtyre analizave, ashtu siç ishte premtuar me rastin e dërgimit të mostrave në Zagreb për testim, Ministria e Shëndetësisë rithekson faktin interesi kryesor i saj mbetet ruajtja dhe përparimi i shëndetit të pacientëve dhe transparenca në çdo rrethanë.