Ministria e Shëndetësisë nënshkroi sot kontratat me tridhjetë e një organizata jo qeveritare, përfituese të mbështetjes financiare nga thirrja publike për financim të projekteve të OJQ-ve në fushën “Ruajtja dhe Përparimi i Shëndetit”.
Me rastin e nënshkrimit të këtyre kontratave, Ushtruesi i Detyrës së Sekretarit të i Përgjithshëm të Ministrisë së Shëndetësisë, dr. Naim Bardiqi tha se objektivi i përgjithshëm i thirrjes për propozime ishte realizimi i aktiviteteve që i kontribuojnë Ruajtjes dhe Përparimit të Shëndetit, si dhe forcimi i partneritetit dhe bashkëpunimit me Organizatat Jo-Qeveritare që veprojnë në këtë fushë, citohet Bardiqi në njoftimin për media, transmeton Gazeta Shneta.
Ai tha se me rastin e përzgjedhjes së OJQ-ve fituese është zbatuar në mënyrë transparente Rregullorja e Ministrisë së Financave Nr.04/2017 Mbi Kriteret, Standardet dhe Procedurat e Financimit Publik të OJQ-ve.
Tridhjetë e një OJQ-të fituese, do të realizojnë projektet në edukim dhe promovim të shëndetit; përmirësimin e shëndetit të grupeve të cenueshme; rehabilitimin fizikal dhe mendor të grupeve të cenueshme dhe përkujdesjen shëndetësore-ditore jashtë spitalore dhe shtëpiake.
Vlera totale e planifikuar e thirrjes publike ishte 400,000.00 euro, kurse shuma minimale e projekteve individuale ishte 1,500.00 euro dhe ajo maksimale 99,000.00 euro.
OJQ-të kanë pasur mundësi të aplikojnë me më së shumti një projekt në kuadër të thirrjes publike, kurse periudha e zbatimit të projekteve fituese është 6-8 muaj, përfundon njoftimi. /Gazeta Shneta/