MSh rihapë tenderin për Dornase alpha, produkti kapë vlerën mbi 580 mijë euro

2022-05-13 në ora 11:24

Ministria e Shëndetësisë ka rihapur tenderin për furnizim me produktin Dornase alpha sol 2.5mg 2.5 ml, produkt i cili përdoret për të përmirësuar funksionimin e mushkrive tek fëmijët me Fibrozë Cistike.

Në tenderin e hapur ditë më parë nuk kishte aplikuar asnjë operatorë ekonomike dhe për këtë arsye tenderi ishte anuluar.
Sipas kontratës, Ministria e Shëndetësisë pritet të paguaj 581,400,00 euro për këtë produkt, me sasi indikatore 12 mujore.

Drejtoresha e Klinikës së Pediatrisë në Qendrën Klinike Universitare të Kosovës, Violeta Graiqevci, thekson se asnjëherë më parë nuk kanë qenë të furnizuar me Dornase alpha.

“Nuk kemi pasur asnjëherë. Është hera e parë që do të sigurohen”, thotë ajo për Gazetën Shneta.

Përveç produktit Dornase alpha, Ministria e Shëndetësisë ka hapur tenderë edhe për gjashtë produkte të tjera për trajtimin e Fibrozës Cistike. Blerja e këtyre produkteve ka koston mbi 3 milion euro.
Deri më tani këto produkte janë siguruar vetëm përmes donacioneve pasi që asnjëherë Ministria e Shëndetësisë nuk ka arritur t’i siguroj përmes buxhetit shtetror për shkak të kostos së lartë të këtyre produkteve.

Çmimi më i ulët është njëri ndër kriteret e kërkuara nga Ministria e Shëndetësisë për Operatorin Ekonomik i cili do të aplikoj për të fituar tenderi.

MSh këto produkte do t’i blejë me këste ndërsa produktet do të blihen përmes porosisë.

Barnat për trajtimin e Fibrozës Cistike kanë çmime të larta ndërsa klinika e pediatrisë nuk është furnizuar asnjëherë më parë me këto produkte dhe si pasojë e kësaj prindërit e fëmijëve me FC detyrohen t’i sigurojnë këto produkte në mënyrë vetanake.

Mungesa e barnave dhe kosto e tyre e lartë nuk janë problemi vetëm për trajtimin e fëmijëve me Fibrozë Cistike. Kjo kategori e pacientëve nuk kanë repart të veçantë për trajtimin e sëmundjes.

“Vend -strehimi” i tyre për marrje të terapisë është vetëm Klinika e Fëmijëve apo Pediatria në Qendrën Klinike Universitare të Kosovës.

Fibroza Cistike është sëmundje gjenetike dhe hynë në listën e sëmundjeve të rralla në botë /Gazeta Shneta/

Të dëshpëruar me shtetin: Prindërit me kredi blejnë barna për fëmijët e tyre të prekur nga Fibroza Cistike