Ekspertët e shëndetit publik paralajmërojnë se valët e të nxehtit nuk sjellin vetëm rrezik nga temperaturat e larta, por edhe përkeqësim të cilësisë së ajrit.
Gjatë ditëve shumë të nxehta dhe me diell, rritet formimi i ozonit në nivelin e tokës, një ndotës atmosferik që krijohet nga reaksionet kimike mes rrezeve të diellit dhe ndotësve të emetuar nga automjetet, industria dhe burime të tjera, shkruan EEA, transmeton Gazeta Shneta.
Ozoni në nivelin e tokës mund të irritojë rrugët e frymëmarrjes, të shkaktojë kollë, vështirësi në frymëmarrje, dhimbje gjoksi dhe ulje të funksionit të mushkërive, edhe te persona të shëndetshëm.
Rreziku është veçanërisht i lartë për personat me astmë, sëmundje kronike të mushkërive, sëmundje të zemrës, të moshuarit dhe fëmijët, të cilët mund të përjetojnë përkeqësim të simptomave dhe nevojë për trajtim mjekësor.
Specialistët rekomandojnë që gjatë ditëve me nivele të larta të ozonit qytetarët të kufizojnë aktivitetin fizik intensiv në ambiente të hapura, sidomos gjatë orëve të pasdites, kur përqendrimet e këtij ndotësi janë zakonisht më të larta.
Gjithashtu këshillohet ndjekja e njoftimeve për cilësinë e ajrit, qëndrimi në ambiente të freskëta dhe përdorimi i barnave sipas rekomandimeve të mjekut për personat me sëmundje kronike të frymëmarrjes.
Ekspertët theksojnë se me rritjen e temperaturave si pasojë e ndryshimeve klimatike, episodet me nivele të larta të ozonit pritet të bëhen më të shpeshta. Për këtë arsye, ata bëjnë thirrje për masa më të forta për uljen e ndotjes së ajrit dhe mbrojtjen e grupeve më të rrezikuara të popullsisë./ Gazeta Shneta/