Dhimbjet në pjesën e poshtme të shpinës mund të lehtësohen më mirë përmes adoptimit të zakoneve të shëndetshme të jetesës sesa trajtimeve tradicionale, sipas një studimi të ri.
Studimi, i publikuar më 10 janar në “JAMA Network Open”, tregon se individët që morën këshilla për përmirësimin e stilit të jetesës shfaqën një cilësi më të mirë të jetës dhe funksionim më të lartë krahasuar me ata që ndoqën kujdesin standard, shkruan Health Day transmeton Gazeta Shneta.
Chris Williams, hulumtues i lartë në Universitetin e Sidneit, Australi, theksoi se dhimbja e shpinës nuk duhet trajtuar vetëm në nivelin fizik. “Trupat tanë nuk janë si makina, ne jemi ekosisteme ku shumë faktorë ndërveprojnë dhe përcaktojnë se si funksionojmë dhe si ndjehemi,” tha ai.
Në kuadër të studimit, fizioterapeutët, dietologët dhe këshilltarët shëndetësorë ndihmuan pjesëmarrësit të identifikonin zakonet që mund të përkeqësonin dhimbjen, si pesha e tepërt, mungesa e aktivitetit fizik, dieta e dobët, gjumi i pamjaftueshëm, duhanpirja dhe përdorimi i tepërt i alkoolit. Për gjashtë muaj, grupi i këshillimit mori mbështetje të vazhdueshme për t’i adresuar këto faktorë.
Rezultatet treguan se pjesëmarrësit në grupin e këshillimit kishin më pak paaftësi nga dhimbja e shpinës sesa grupi kontroll.
Williams theksoi se trajtimi gjithëpërfshirës që merr parasysh zakonet dhe stilin e jetesës është më efektiv se përdorimi i thjeshtë i ilaçeve ose procedurave mjekësore.
Studimi sugjeron se ndryshimet e shëndetshme në stilin e jetesës janë një pjesë kyçe e menaxhimit të dhimbjes së shpinës. /Gazeta Shneta/