Në Ditën Botërore të Sepsës, ekspertët e shëndetit rikujtojnë se sepsa prek 1.7 milionë njerëz çdo vit në SHBA dhe shkakton mbi 350,000 vdekje.
Megjithatë, pavarësisht këtyre shifrave tronditëse, shumë prej popullatës nuk dinë çfarë është sepsa ose si ta njohin atë para se të bëhet fatale, raporton Health Day transmeton Gazeta Shneta.
“Simptomat mund të variojnë nga frymëmarrja e shpejtuar, rrahjet e shpejta të zemrës, temperaturë e lartë, të dridhura dhe rënie e papritur e tensionit të gjakut,” tha Dr. Faisal Masud, drejtor i kujdesit intensiv në spitalin ‘Houston Methodist’.
“Është shumë e rëndësishme që simptomat t’i ndani menjëherë me një profesionist shëndetësor, sepse njohja e hershme mund të bëjë diferencën mes jetës dhe vdekjes.”
Sepsa është një reagim ekstrem i organizmit ndaj infeksionit. Kur sistemi imunitar mbireagon, shkakton inflamacion të gjerë që mund të dëmtojë organet dhe të çojë në vdekje. Edhe një infeksion i vogël mund të shkaktojë këtë reagim të rrezikshëm.
Në shkallë globale, sepsa është përgjegjëse për 1 në 10 shtrime në terapi intensive dhe mbetet shkaku kryesor i vdekjeve në spitalet amerikane, thonë ekspertët.
Shumica e rasteve fillojnë jashtë spitalit, gjë që e bën jetike njohjen e hershme të shenjave paralajmëruese në shtëpi.
Mjekët rekomandojnë të mbahet mend akronimi T.I.M.E.:
T për Temperature (ndryshime temperature, si ethe ose temperaturë e ulët);
I për Infection (infeksion);
M për Mental status change (ndryshime në gjendjen mendore);
E për Extremely ill feeling (ndjesi e rëndë sëmundjeje);
“Simptomat mund të përfshijnë frymëmarrje të shpejtuar, rritje të rrahjeve të zemrës, ethe, të dridhura dhe rënie të papritur të tensionit të gjakut,” përsëriti Masud.
Çdokush mund të zhvillojë sepsë, por disa grupe janë më të rrezikuara:
– Fëmijët nën 1-vjeç.
– Të moshuarit.
– Personat me sëmundje kronike si diabeti, sëmundjet e veshkave, të mëlçisë ose kanceri.
– Ata me sistem imunitar të dobësuar.
Sepsa është emergjencë mjekësore. Trajtimi shpesh përfshin antibiotikë dhe lëngje intravenoze. /Gazeta Shneta/