Auditori i Brendshëm i SHSKUK-së ka gjetur shumë parregullsi në përdorimin e veturave zyrtare në QKUK dhe spitale rajonale.
Në bazë të Udhëzimit Administrativ 03/2008, zyrtarët mund të përdorin veturat e institucionit edhe jashtë orarit të punës me vendim të ministrisë përkatëse me propozim të drejtorit të përgjithshëm. Por dy zyrtarë të SHSKUK-së nuk i kanë ndalur veturat e shtetit 24 orë, pa pasur vendim nga ministri e as drejtori i përgjithshëm, shkruan Gazeta Shneta.
Auditori i Brendshëm në raportin e datës 10 qershor 2020 për periudhën janar-maj ka gjetur se dy vetura zyrtare janë përdorur 24 orë edhe jashtë orarit zyrtar të punës dhe për të njëjtat nuk ka pasur vendim nga ministri i Shëndetësisë e as nga Bordi Drejtues ose drejtori i Përgjithshëm.
“Vetura Shkoda me nr. të targave 3Z-178-12 të cilën e ka në përdorim drejtori i SHPTA-së në QKUK për të cilën mungojnë evidencat e fletudhëtimeve dhe shpenzimeve të derivateve, sipas deklaratës së shefit të sektorit të shërbimeve teknike dhe udhëheqësit të njësisë së transportit në QKUK, kjo veturë nuk është në menaxhimin e tyre”, thuhet në raport.
Drejtori i kësaj njësie, Visar Islamaj, i cili pati ardhur në këtë pozitë në kohën kur SHSKUK udhëhiqej nga Basri Sejdiu dhe ish-ministri i PDK-së Uran Ismaili. Islamajt i është ngritur aktakuzë nga Prokuroria e Prizrenit në janar të këtij viti për keqpërdorimin e pozitës zyrtare në kohën sa mbante pozitën e drejtorit komunal në Prizren nga radhët e PDK-së.
Gazeta ka dërguar pyetje në adresën elektronike të Islamajt, por ai nuk ka kthyer përgjigje për përdorimin e veturës. Njëjtë ka vepruar edhe menaxhmenti i SHSKUK-së të cilët nuk janë përgjigjur në pyetjet e Gazetës Shneta.
Sikurse Islamaj njëjtë kishte vepruar edhe drejtori i Qendrës Kombëtare të Mjekësisë Sportive Adem Nura. Auditori ka gjetur se vetura KIA Rio me numër të targave 01-479-IH, të cilën e kishte në përdorim Nura, nuk posedonte kërkesat me shkrim për përdorimin e automjetit zyrtar.
Nura ka deklaruar se nuk e shfrytëzon veturën jashtë orarit të punës për nevojat private. Ai ka deklaruar se i ka të gjitha evidencat për kilometrat e kaluara me veturë.
“Unë e kam në shfrytëzim veturën vetëm për udhëtim nga shtëia në Mitrovicë dhe në punë në Prishtinë. Ndoshta ndonjëherë mund të vonohem pas orarit, por të gjitha kilometrat e kaluara i kam të evidentuara. Auditori mund të shkruaj çfarë të duan”, ka deklaruar Nura.
Në Spitalin e Ferizajt veturat private u furnizuan me derivate për kryerjen e punëve zyrtare
Në raportin e datës 10 qershor 2020 Auditori ka theksuar se në Spitalin e Ferizajt veturat private janë mbushur me derivate të naftës për kryerjen e punëve zyrtare.
Gjithashtu në këtë spital për gjashtëmujorin e parë të vitit 2019 mungojnë formularët e fletëudhëtimit për automjetet që kanë në funksion dhe evidencat për kilometrat e kaluara si dhe raportet për përdorimin e automjeteve individuale dhe të përgjithshme.
Por këto i ka mohuar drejtori i këtij spitali Jeton Zeqiri. Në një përgjigje me shkrim ai ka thënë se që dy vite sa mban ai këtë pozitë, i ka ndaluar të gjitha furnizimet e punëtorëve me derivate për kryerjen e punëve të spitalit.
“Gjithashtu unë kam kërkuar një veturë zyrtare për të eliminuar një dukuri të tillë dhe e kam marr një veturë nga MSH të vjetër dhe ajo veturë furnizohet me derivate. Gjithashtu vlen të theksohet se ne në maksimum i kemi ulur shpenzimet për derivate”, ka deklaruar Zeqiri.
Zeqiri ka shtuar se i kanë të dokumentuara të gjitha evidencat e formularëve dhe çdo lëvizje që bëhet me autoambulanca dhe veturën zyrtare.
Evidencat për përdorimin e veturave zyrtare mungojnë edhe në Spitalin e Prizrenit, Vushtrrisë dhe Mitrovicës. Poashtu auditori ka gjetur se njësitë përbërëse të SHSKUK-së nuk kanë evidentuar llojet dhe sasitë e pjesëve të ndërruara gjatë mirëmbajtjes dhe riparimit të automjeteve zyrtare. /Gazeta Shneta/
