Nënkryetarja e Lidhjes Demokratike të Kosovës, Shqipe Mjekiqi-Sadiku, i ka dal në mbrojtje kryesueses së Bordit Drejtues të Shërbimit Spitalor Klinik Universitar Agreta Gecaj-Gashi.
Mjekiqi-Sadiku ka thënë se nuk e ka takuar asnjëherë Gecaj-Gashin, por thirrjet e deputetëve të Komisionit për Shëndetësi për shkarkimin e saj, i ka konsideruar të padrejta, transmeton Gazeta Shneta.
Nënkryetarja e LDK-së ka thënë se Kosova nuk është vendi i vetëm ku janë rritur listat e pritjes, dhe kjo ka ndodhur për shkak të pandemisë e jo nga keq-menaxhimi.
“Qeveria dhe ligjvënësit kanë për detyrë të sigurojnë dhe mbrojnë pavarësinë në emërimin dhe shkarkimin e anëtarëve të bordeve të institucioneve publike dhe të mos pengojnë punën e tyre. E ne si shoqëri e kemi për detyrë të mbrojmë individë të tillë, e aq më shumë gra – të pakta në pozita të larta drejtuese të cilat qëndrojnë mbi politikën gjersa kryejnë funksionin e tyre me dinjitet”, ka shkruar Mjekiqi-Sadiku.
Një nga deputetët që ka kërkuar shkarkimin e Gecaj-Gashit dhe Bordit të SHSKUK-së është edhe Armend Zemaj nga LDK. Ndryshe Bordi i SHSKUK-së ishte emëruar nga Qeveria Kurti 1 kur ishte në koalicion me LDK-në.
Më poshtë gjeni reagimin e plotë të Shqipe Mjekiqi-Sadikut:
Znj. Agreta Gecaj Gashi nuk e njoh dhe s’e kam takuar asnjëherë. Për herë të parë kam dëgjuar për të para disa ditësh kur në Komisionin për Shëndetësi u diskutua për të në cilësinë e Kryesueses së Bordit të SHSKUK-së, e emëruar gjatë mandatit të Qeverisë Kurti I.
Disa deputetë kanë kërkuar shkarkimin e saj dhe të Bordit, ndër të tjerash, me pretendimin për keqpërdorim të pozitës, se ka pasur me pak operacione në spitalet publike në 2021 krahasuar me vitin 2020 dhe se listat e pritjes janë zgjatur në disa muaj më shumë gjatë kësaj periudhe.
Nga kurreshtja shiqova disa të dhëna nga vendet tjera. Një raport i publikuar në 2021 në Irlandë, me titull ‘një vit ky si kurrë më parë’ duke iu referuar vitit 2021, gjen se ka pasur një rritje prej 153% të numrit të pacientëve me nevojë për intervenim që kanë pritur më shumë se 12 muaj në vitin 2021 krahasuar me vitin 2020. Gjithashtu janë realizuar 13% më pak intervenime me urgjencë dhe 30% më pak intervenime elektive në 2020. Shkaku – pandemia dhe jo keq-menaxhimi.
Qeveria dhe ligjvënësit kanë për detyrë të sigurojnë dhe mbrojnë pavarësinë në emërimin dhe shkarkimin e anëtarëve të bordeve të institucioneve publike dhe të mos pengojnë punën e tyre. E ne si shoqëri e kemi për detyrë të mbrojmë individë të tillë, e aq më shumë gra – të pakta në pozita të larta drejtuese të cilat qëndrojnë mbi politikën gjersa kryejnë funksionin e tyre me dinjitet.