Një grua në rajonin Harari të Etiopisë ka sjellë në jetë pesënjakë, pas një pritjeje prej 12 vitesh për të pasur një fëmijë.
35-vjeçarja Bedriya Adem lindi katër djem dhe një vajzë në spitalin Hiwot Fana Specialised Hospital, gjatë një lindjeje me operacion cezarian të martën në mbrëmje. Sipas mjekëve, të pesë foshnjat janë në gjendje të mirë shëndetësore, megjithëse peshojnë nga 1.3 deri në 1.4 kilogramë secili, shkruan BBC, transmeton Gazeta Shneta.
Bedriya tha se bashkëshorti i saj është shumë i lumtur për këtë “bekim të madh”, ndërsa vetë ajo e përshkroi momentin si një përmbushje të lutjeve të saj pas një periudhe të gjatë vuajtjeje emocionale.
“E kam të vështirë ta përshkruaj gëzimin tim me fjalë,” u shpreh ajo, duke kujtuar vitet e pritjes dhe presionit shoqëror që kishte përjetuar për shkak të mungesës së fëmijëve.
Drejtori mjekësor i spitalit, Dr. Mohammed Nur Abdulahi, tha se nëna dhe foshnjat po marrin kujdes të vazhdueshëm mjekësor dhe se gjendja e tyre është stabile.
Sipas mjekëve, shtatzënia natyrale me pesënjakë është jashtëzakonisht e rrallë, me një probabilitet rreth 1 në 55 milion raste.
Bedriya tha se më parë i ishte thënë se priste katër fëmijë, por gjatë lindjes u zbulua edhe një foshnjë e pestë. Ajo dhe bashkëshorti i saj tashmë u kanë vendosur emrat fëmijëve: Naif, Ammar, Munzir, Nazira dhe Ansar.
Nëna e re shprehu gjithashtu shqetësim për përballimin e kostove të rritjes së pesë fëmijëve, por tha se shpreson në ndihmën e komunitetit dhe të qeverisë. /Gazeta Shneta/