Studiuesit kanë zhvilluar një mjet të ri, të thjeshtë për t’u përdorur, që mund të identifikojë më herët nivelin e rrezikut te pacientët me kancer metastatik të prostatës. Që në momentin e diagnostikimit, ky test është në gjendje të parashikojë se sa mirë do t’i përgjigjet pacienti trajtimit për kancerin e prostatës të ndjeshëm ndaj hormoneve në fazë metastatike (mHSPC), duke dalluar veçanërisht pacientët me rrezik të lartë që ka gjasa të kenë përgjigje të dobët ndaj terapisë.
Një përmbledhje e publikuar së fundmi në “Nature Communications”, përshkruan këtë mjet inovativ, i cili parashikon përgjigjen e hershme të favorshme të antigjenit specifik të prostatës (PSA) te pacientët me mHSPC që trajtohen me inhibitorë të rrugës së receptorit androgjen (ARPI).
Këto barna janë tashmë një shtyllë kryesore në trajtimin e kancerit të prostatës dhe po përdoren gjithnjë e më shpesh, shkruan burimi Medical News Today transmeton Gazeta Shneta.
Për zhvillimin e mjetit, studiuesit analizuan të dhëna nga tre prova të mëdha klinike, duke ndërtuar dhe validuar një model statistikor që tregoi saktësi të lartë në parashikimin e përgjigjes së hershme të PSA-së.
Sipas ekspertëve, ky zhvillim është i rëndësishëm sepse metodat aktuale për vlerësimin e rrezikut janë të kufizuara dhe shpesh jo të sakta.
Mjeti i ri u mundëson mjekëve dhe pacientëve të kuptojnë më mirë probabilitetin individual të përgjigjes ndaj trajtimit standard dhe të përshtatin terapinë sipas nevojës. Kjo hap rrugën për trajtime më të personalizuara, më efektive dhe potencialisht më të sigurta, duke balancuar më mirë përfitimin onkologjik me efektet anësore të trajtimit. /Gazeta Shneta/