Vetëm pesë ditë pas ndërhyrjes kirurgjikale, një burrë 28-vjeçar, i paralizuar prej tetë vitesh si pasojë e një dëmtimi të rëndë të palcës kurrizore, arriti të kontrollojë pajisje të ndryshme vetëm me mendje. Ai ishte në gjendje të drejtonte karrocën me rrota, të shfletonte internetin, të luante video-lojëra dhe të menaxhonte pajisje të shtëpisë inteligjente.
Ky sukses shënon një hap të rëndësishëm në kuadër të provës së parë klinike në Kinë të një ndërfaqeje tru-kompjuter (BCI) plotësisht të implantuar, pa tela dhe funksionale. Teknologjia BCI lidh sistemin nervor të njeriut me pajisje që interpretojnë aktivitetin e trurit, duke i lejuar përdoruesit të veprojnë – si përdorimi i kompjuterit apo lëvizja e një proteze – vetëm përmes mendimit, raporton Euronews Health transmeton Gazeta Shneta.
“Pacienti mund të kontrollojë pajisjet shtëpiake dhe madje edhe karrocën e tij me rrota,” deklaroi profesor Mao Ying, president i Spitalit Huashan në Universitetin Fudan.
Pajisja, e zhvilluar nga kompania Shanghai NeuroXess, përmban 64 elektroda jashtëzakonisht të holla, secila vetëm 1% e gjerësisë së një floku njerëzor, duke e bërë atë një nga implantet BCI më të vogla dhe më pak invazive në botë.
Elektrodat vendosen në tru, ndërsa bateria, antena dhe procesori implantohen nën lëkurë, pranë kraharorit. Pajisja karikohet në mënyrë wireless përmes një stacioni të jashtëm.
Ekspertët besojnë se kjo teknologji mund të ndryshojë jetën e miliona njerëzve me paralizë në mbarë botën, njësoj si përpjekjet e kompanisë Neuralink të Elon Musk, e cila po zhvillon prova të ngjashme me rezultate premtuese. /Gazeta Shneta/