Ndotja e ambientit është gjithnjë e më shumë në rritje në qytetet me popullsi të madhe, por në përgjithësi mbetet një problem edhe për qytetet e vogla.
Efektet negative prekin këdo, të mëdhenj apo të vegjël qofshin, por këta të fundit janë më të ndjeshëm dhe mund të kenë probleme më të mëdha në organizëm. Duke qenë kështu, kohët e fundit janë marrë masat, duke nxjerrë në përdorim dhe karrocat e mbuluara.
Sipas një studimi britanik nga Universiteti i Surrey të publikuar në revistën “Environmental pollution”, prindërit duhet të bëjnë tepër kujdes sidomos gjatë orëve me trafik të rënduar.
Kujdes!
Studimi u krye në Guilford, një qytet anglez me rreth 70 mijë banorë dhe nga ekspertët u mat niveli i smogut në zona të ndryshme të qytetit. Gjithashtu u llogarit me përafërsi edhe koha e ekspozimit ndaj substancave toksike që derivonin në ajër. Gjatë studimit u përdorën edhe karrocat e mbyllura për të parë shkallën e efekteve negative tek fëmija me ose pa to.
Me apo pa karroca të mbuluara?
Nga studimi u tregua se vendet me ndotje më të madhe ishin stacionet e autobusëve dhe semaforët në kryqëzimet e rrugëve. Sipas ekspertëve karrocat duhet të mbrohen edhe gjatë ditëve pa shi me mbulesat plastike kundër shiut (mos i përdorni gjatë verës). Kjo barrierë mekanike do të bënte të mundur që fëmija juaj të ekspozohej më pak ndaj ndotjeve të ambientit. Evitoni daljen gjatë orëve të mëngjesit kur trafiku është më i rënduar dhe ndotja më e madhe./pernenat/