Norvegjia ka filluar për herë të parë përdorimin e analizave të gjakut për të identifikuar ndryshimet në tru që lidhen me sëmundjen Alzheimer.
Testet tashmë janë të disponueshme në spitale dhe përdoren tek pacientët që shfaqin simptoma të dëmtimit njohës.
Analiza mat nivelin e një proteine specifike të lidhur me Alzheimerin dhe ofron një metodë më të thjeshtë dhe më pak invazive krahasuar me procedurat e mëparshme, të cilat kërkonin ndërhyrje kurrizore.
Sipas një studimi të udhëhequr nga Spitali Universitar i Stavanger, mbi 11 mijë mostra gjaku nga persona 57 vjeç e lart treguan se një në tre norvegjezë mbi moshën 70 vjeç kanë ndryshime në tru të lidhura me Alzheimerin. Përqindja rritet ndjeshëm tek të moshuarit mbi 90 vjeç, ku më shumë se 60% rezultuan të prekur.
Autoritetet shëndetësore po planifikojnë që testi të bëhet i qasshëm edhe përmes mjekëve të përgjithshëm, me synimin për të përmirësuar zbulimin e hershëm dhe kujdesin parandalues. Ndërkohë, barna të reja që synojnë ngadalësimin e përparimit të sëmundjes, si Leqembi dhe Kisunla, pritet të vlerësohen së shpejti në Norvegji, megjithëse kostoja dhe nevoja për administrim spitalor mbeten sfida.