Numri i spitaleve që do mund të ndërtoheshin me 53 milionë eurot e “Bechtel-Enka”-n

2018-06-06 në ora 17:20

Shteti i Kosovës i dha kompanisë “Bechtel&Enka”, e cila po e ndërton autostradën për Shkup, “Arbën Xhaferi”, 53 milionë euro pagesë shtesë për shkak të vonesave të bëra nga qeveria për kryerjen e pagesave.

E nëse kjo shumë e parave do t’i kalonte Ministrisë së Shëndetësisë, vendit do të mund t’i shtoheshin dhjetëra spitale. Në bazë të disa përllogaritjeve të bëra nga Ndërtimi.info, me 53 milionë euro në vend do të mund të ndërtoheshin pesë spitale sikurse ai i Pejës, për ndërtimin e të cilit ishin shpenzuar 9 milionë e 468 mijë euro.

Por, nëse merret për bazë shuma e parave që është shpenzuar ndërtimin e Spitalit të Vushtrrisë, Kosova do të bëhej me shtatë spitale, ku për ndërtimin e secilit do të nevojiteshin rreth 7 milionë euro.

E ndërkohë në kryeqytet ende nuk ka filluar të ndërtohet Spitali i Pediatrisë, që është donacion prej 22 milionë euro e do të ketë hapësirë rreth 10 mijë metra katrorë.

Me 53 milionë euro do të mund të ndërtoheshin edhe dy spitale të tilla sikurse ky i Pediatrisë.