Evropa pritet të mbetet rajoni me përdorimin më të lartë të duhanit në botë deri në vitin 2030, ndërsa cigaret elektronike dhe produktet e reja me nikotinë po tërheqin gjithnjë e më shumë të rinj, paralajmëron Organizata Botërore e Shëndetësisë.
Sipas raportit, në vitin 2024 rreth 173 milionë persona në rajonin evropian të OBSH-së përdornin duhan. Çdo vit, duhani lidhet me mbi 1.1 milion vdekje nga sëmundjet jo të transmetueshme në këtë rajon. Drejtori rajonal për Evropën, Hans Kluge, paralajmëroi se pa masa të përshpejtuara rajoni do të mbetet me performancën më të dobët globalisht.
Rreth katër milionë adoleshentë (13–15 vjeç) përdorin produkte duhani. OBSH e konsideron veçanërisht urgjente frenimin e e-cigareve, përdorimi i të cilave arrin në 14.3% në këtë grupmoshë, me nivele pothuajse të barabarta mes djemve dhe vajzave. Tek të rriturit, vlerësohen rreth 31.4 milion përdorues të e-cigareve.
Rajoni evropian nuk pritet të arrijë objektivin për uljen me 30% të përdorimit të duhanit tek gratë deri në vitin 2025; rënia e parashikuar është vetëm 12% që nga viti 2010. Mbi 40% e grave duhanpirëse në botë jetojnë në këtë rajon, ndërsa në shumë vende përdorimi i e-cigareve është më i lartë tek vajzat sesa tek djemtë.
Vetëm 18 nga 53 vendet e rajonit kanë ligje pa tym që mbulojnë të gjitha hapësirat publike. Ndërkohë, propozimi i Komisioni Evropian për rritjen e taksave mbi produktet e duhanit dhe e-cigaret deri në vitin 2028 po përballet me kundërshtime nga disa shtete anëtare.
OBSH u bën thirrje vendeve evropiane të forcojnë rregullimin e produkteve të reja me nikotinë, të ndalojnë aromatizuesit dhe të kufizojnë marketingun që synon të rinjtë.