Organizata Botërore e Shëndetësisë (OBSH) ka ngritur alarmin se pijet me sheqer dhe alkooli po bëhen gjithnjë e më të përballueshme në shumë vende të botës, kryesisht për shkak të taksave të ulëta ose mungesës së politikave fiskale parandaluese.
Sipas OBSH-së, kjo situatë po kontribuon drejtpërdrejt në rritjen e sëmundjeve kronike si diabeti, obeziteti, sëmundjet e zemrës, kanceri dhe dëmtimet e mëlçisë, shkruan Reuters, transmeton Gazeta Shneta.
Në një raport, OBSh-ja thekson se çmimet reale të këtyre produkteve nuk kanë ndjekur rritjen e inflacionit apo të të ardhurave, duke i bërë ato më të aksesueshme sidomos për të rinjtë dhe grupet me të ardhura të ulëta.
Ekspertët vlerësojnë se konsumimi i lartë i pijeve me sheqer është një nga faktorët kryesorë të rritjes globale të diabetit të tipit 2, ndërsa alkooli lidhet me mbi 3 milionë vdekje çdo vit në mbarë botën.
Si përgjigje, OBSH ka prezantuar nismën “3 by 35”, e cila synon që deri në vitin 2035 vendet të rrisin taksat mbi pijet me sheqer, alkoolin dhe duhanin me të paktën 50 për qind.
Sipas vlerësimeve të organizatës, kjo masë mund të gjenerojë deri në 1 trilion dollarë të ardhura globale, të cilat mund të investohen në sistemet shëndetësore, parandalimin e sëmundjeve dhe mbulimin universal shëndetësor.
OBSH thekson se rritja e taksave nuk ka për qëllim vetëm mbledhjen e fondeve, por mbi të gjitha uljen e konsumit dhe mbrojtjen e shëndetit publik.
Studimet tregojnë se rritja e çmimeve është një nga mjetet më efektive për të ulur përdorimin e produkteve të dëmshme, veçanërisht tek të rinjtë.
Organizata u bën thirrje qeverive që të veprojnë urgjentisht, duke e konsideruar këtë masë si një investim afatgjatë për shëndetin e popullsisë. /Gazeta Shneta/