Organizata Botërore e Shëndetësisë (OBSH), thotë se ka nxjerrë udhëzime që këshillojnë njerëzit se si të testojnë veten për koronavirusin, disa muaj pasi kritikët thanë se mungesa e rekomandimeve po ngadalësonte përpjekjet për të ndaluar pandeminë në vendet e varfëra.
Në një konferencë shtypi të mërkurën, drejtori i përgjithshëm i OBSH-së, Tedros Adhanom Ghebreyesus, njoftoi se agjencia ishte e shqetësuar se disa vende po reduktojnë në mënyrë dramatike testimin e tyre për COVID-19 pasi virusi duket se po tërhiqet në një pjesë të shteteve të zhvilluara, shkruan MedicalxPress përcjell Gazeta Shneta.
Sipas shifrave të OBSH-së, rastet dhe vdekjet me COVID-19 kanë rënë ndjeshëm në javët e fundit.
“Vetë-testimi mbetet një mjet jetik në luftën tonë kundër COVID si pjesë e një strategjie gjithëpërfshirëse,” tha Tedros, duke shtuar se braktisja e testimit do të gjymtonte përpjekjet e zyrtarëve për të gjurmuar sëmundjen.
Disa aktivistë kanë kritikuar prej kohësh mungesën e udhëzimeve të OBSH-së, rreth vetë-testimit, si një pengesë kryesore për vendet e varfëra, duke vënë në dukje se donatorët nuk janë të gatshëm t’i blejnë ato në mungesë të ndonjë rekomandimi të OBSH-së.
Ndërsa njerëzit në shumë vende të pasura kanë pasur akses të lehtë në teste të shpejta për muaj të tërë, kompletet e vetë-testimit rrallë herë kanë qenë të disponueshme në vendet e varfëra, duke penguar përpjekjet për të ngadalësuar pandeminë.
Zyrtarë të shumtë shëndetësorë i janë lutur vazhdimisht OBSH-së që të lëshojnë këshilla vetë-testimi për këtë arsye.
Tedros, raportoi se rekomandimi i ri rreth vetë-testimin, do të ngjallë shpresë se do të adresonte pabarazinë në testim.
“Shpresojmë që udhëzimet tona të reja do të ndihmojnë gjithashtu në rritjen e aksesit në testim, i cili është shumë i shtrenjtë për shumë vende me të ardhura të ulëta, ku këto mjete mund të luajnë një rol të rëndësishëm në zgjerimin e testimit,” tha ai. /Gazeta Shneta/