Organizata Botërore e Shëndetësisë (OBSH) ka publikuar versionet e përditësuara të Listës së Barnave Esenciale (EML) dhe Listës së Barnave Esenciale për Fëmijë (EMLc), duke përfshirë trajtime të reja për disa lloje kanceri, si dhe për diabetin dhe gjendje të lidhura si obeziteti. Këto lista ndihmojnë vendet në sigurimin e barnave, programet e sigurimeve shëndetësore dhe furnizimin publik.
Komiteti ekspert i OBSH-së shqyrtoi 59 aplikime, duke shtuar 20 barna të reja në EML, 15 në EMLc dhe duke përcaktuar indikacione të reja për shtatë barna ekzistuese, shkruan Health Day transmeton Gazeta Shneta.
Studimet treguan se agonistët e receptorëve GLP-1 janë të dobishëm për personat me diabet tip 2, veçanërisht ata me sëmundje të zemrës ose veshkave, pasi përmirësojnë kontrollin e glukozës, ulin rrezikun kardiak dhe renal, ndihmojnë në humbjen e peshës dhe reduktojnë mortalitetin e hershëm. Semaglutidi, dulaglutidi, liraglutidi dhe tirzepatidi tani janë pjesë e EML.
Për barnat kundër kancerit, komiteti rekomandoi qasje më të gjerë ndaj imuno-terapive si pembrolizumab, atezolizumab dhe cemiplimab, duke promovuar barazi në kujdesin onkologjik.
Strategjitë e rekomanduara përfshijnë optimizimin e dozave për të rritur aksesin dhe përballueshmërinë.
Deusdedit Mubangizi, drejtor i politikave dhe standardeve për barnat dhe produktet shëndetësore në OBSH, theksoi se një pjesë e madhe e shpenzimeve private për sëmundjet jongjitese shkon për barna, përfshirë ato esenciale, dhe se arritja e aksesit të drejtë kërkon vullnet politik, bashkëpunim multisektorial dhe programe të fokusuar te njerëzit, pa lënë askënd prapa. /Gazeta Shneta/