Organizata Botërore e Shëndetësisë ka lëshuar paralajmërime serioze për tre kërcënime të mëdha që po përshpejtohen në nivel global: tuberkulozin, hepatitin viral dhe rezistencën ndaj antibiotikëve.
Drejtori Rajonal i OBSH-së për Evropën, Hans Kluge, ka theksuar se tuberkulozi mbetet “sëmundja infektive më vdekjeprurëse në botë”, duke marrë jetën e rreth 1 milion personave çdo vit.
Sipas “Raportit Global të Tuberkulozit 2025”, në vitin 2024 janë regjistruar mbi 1.2 milion vdekje dhe 10.7 milion raste të reja, me rezistencën ndaj ilaçeve dhe qasjen e pabarabartë në trajtim që vazhdojnë ta rëndojnë situatën.
Ndërkohë në Evropë, institucionet shëndetësore japin një tjetër sinjal alarmi: rreth pesë milionë njerëz jetojnë me hepatit B ose C pa e ditur fare. ECDC paralajmëron se këto infeksione “të heshtura” mund të dëmtojnë mëlçinë për vite të tëra para se të shfaqen simptomat, duke rritur rrezikun për cirrozë dhe kancer.
Problemi i tretë që po rritet me shpejtësi është rezistenca bakteriale ndaj antibiotikëve. OBSH thotë se në vitin 2023 një në gjashtë infeksione të konfirmuara ka qenë rezistent ndaj disa llojeve të trajtimit, duke rrezikuar që edhe infeksionet e zakonshme të bëhen sërish vdekjeprurëse.
Sipas ekspertëve, këto paralajmërime nënvizojnë nevojën për monitorim më të rreptë, diagnostikim më të hershëm dhe investime më të mëdha në shëndetësi për të parandaluar një krizë më të thellë globale.