Një raport i UN Women vlerëson se mbi 38,000 gra dhe vajza janë vrarë në Gaza që nga tetori 2023 deri në dhjetor 2025 si pasojë e luftës.
Sipas raportit, shifrat bazohen në të dhënat e Ministrisë së Shëndetësisë në Gaza, të cilat janë rregulluar për nën-raportim për shkak të situatës së rëndë në terren.
OKB thekson se gratë, fëmijët dhe të moshuarit përbëjnë më shumë se gjysmën e viktimave, ndërsa shumë prej vdekjeve lidhen me shkatërrimin e infrastrukturës civile si shtëpi, shkolla dhe strehimore. Po ashtu, rreth 11,000 gra dhe vajza vlerësohet se kanë mbetur me aftësi të kufizuara të përhershme, shkruan Euronews.
Përveç humbjes së jetëve, gratë në Gaza përballen edhe me pasoja të rënda sociale, ekonomike dhe shëndetësore, duke përfshirë mungesën e strehimit, kufizimin e shërbimeve mjekësore dhe vështirësitë në jetën e përditshme në kushte lufte.