Kombet e Bashkuara thonë se u është dhënë leje për të dërguar “rreth 100” kamionë me ndihma në Gaza.
Kjo vjen pas paralajmërimeve nga shefi humanitar i OKB-së se 14,000 foshnje mund të vdesin gjatë 48 orëve të ardhshme nëse furnizimet me ndihma nuk arrijnë tek ato, raporton BBC.
Duke folur më parë për BBC-në, Tom Fletcher tha se pesë kamionë u lejuan të hynin dje pas një bllokade 11-javore dhe shpresonte për më shumë sot.
Palestinezët në Gazën veriore kanë folur për mediat ndërkombëtare për vështirësitë e tyre për të gjetur ushqim – dhe shqetësimet e tyre se ndihma e kufizuar që po lejohet tani nuk do t’i arrijë.
“Nuk mund të gjejmë një copë bukë për të ushqyer fëmijët tanë… si do të marrim ndihmë nga jugu? Do të jetë e vështirë për ne të shkojmë atje. Po jetojmë në një tragjedi”, thotë një burrë në Qytetin e Gazës.
“Njerëzve po u bie të fikët nga mungesa e ushqimit dhe uria. Nuk dimë çfarë t’i ushqejmë fëmijët tanë. As thjerrëzat, orizi apo mielli nuk janë në dispozicion, apo ndonjë lloj tjetër ushqimi. Perimet nuk janë në dispozicion. Askush nuk mund të përballojë të blejë një domate. Askush nuk mund të blejë një qese mielli”, tha një tjetër.