Presidentja është shfaqur sot në Presidencë në praninë e disa gazetarëve, të cilëve u kërkoi të mos i incizojnë vajzat e saj, një ditë pasi një kameraman i mediumit Paparaci u ndalua nga mbrojtja e saj e afërt.
Paparaci ka publikuar një video duke mohuar se janë incizuar vajzat e saj, ndërsa Vjosa Osmani tha se nuk ka qenë kërkesë e saj ndalimi i kameramanit, ndonëse në një reagim të djeshëm nuk e përmendi sjelljen e atyre që kujdesen për sigurinë e saj dhe të familjes. Këtë raportim, presidentja e konsideroi “politik”.
“Gënjeshtër tjetër është se kinse mbrojtja ime e afërt e ka arrestuar një gazetar. Unë vetë kam kërkuar nga mbrojtja ime e afërt që të mos i prekin me dorë. Ata nuk arrestojnë gazetarë, kanë qenë në kryerjen e detyrës zyrtare”, tha ajo. Tha se nuk ka “asnjë informacion” se “nga kush dhe si” është ndaluar kameramani.
Osmani tha se vajzat e saj “mezi presin ditën që të shkojnë në shkollë pa përcjellje”.
“Incizimi i paautorizuar është vepër penale”, tha ajo, duke shtuar se te shkolla private ku vajzat e saj ndjekin mësimin, “ka qenë shenja që ndalohet incizimi i paautorizuar”.
Në një përpjekje për ta arsyetuar sjelljen, Osmani tha ndër tjerash: “Mos harroni se në këtë vend ka pasur vrasje për motive politike”.
Ajo tha se nuk është pyetur se ku e ndjekin mësimin vajzat e saj.
“Askush nuk më ka dërguar pyetje mua se ku i dërgon vajzat në shkollë”, tha ajo.
Prezenca e mbrojtjes, të cilën e quajti “profesionale”, tha se është “e përcaktuar me protokolle”.
“Kurrë nuk i kam sulmuar familjet e askujt. As kurrë nuk jam marrë me xhipat e askujt”, tha ajo.
Osmani tha se “kam përgjegjësi për veprimet dhe deklaratat e mia, jo të të tjerëve”.