Barnat e njohura për humbje peshe dhe diabet, si Ozempic dhe Wegovy, mund të kenë një përfitim të papritur: ngadalësimin e proceseve biologjike të plakjes.
Një studim i publikuar në revistën shkencore “Nature Communications” zbuloi se semaglutidi – përbërësi aktiv i këtyre medikamenteve – lidhet me një ngadalësim të disa treguesve molekularë të plakjes biologjike te personat që jetojnë me HIV, shkruan burimi Medical News Today transmeton Gazeta Shneta.
Studimi përfshiu 84 të rritur me HIV dhe grumbullim të tepërt yndyre në trup, të cilët morën injeksione javore me semaglutid ose placebo për 32 javë. Në fund të periudhës së studimit, pjesëmarrësit që përdorën semaglutid treguan një ngadalësim të plakjes biologjike me rreth 9%, sipas një metode të avancuar matëse të njohur si “DunedinPACE”.
Studiuesit përdorën të ashtuquajturat “orë epigjenetike”, të cilat vlerësojnë moshën biologjike duke analizuar ndryshime kimike në ADN. Rezultatet treguan përmirësime në tregues të lidhur me inflamacionin, trurin, zemrën, mëlçinë, veshkat dhe shëndetin metabolik.
Ekspertët theksojnë se gjetjet nuk do të thonë se semaglutidi e kthen pas plakjen ose i bën njerëzit më të rinj. Megjithatë, ato ofrojnë provat e para klinike se barnat e grupit GLP-1 mund të ndikojnë në mekanizmat biologjikë që lidhen me plakjen dhe sëmundjet e moshës.
Një nga shpjegimet e mundshme është aftësia e semaglutidit për të ulur inflamacionin kronik dhe yndyrën viscerale – yndyrën që grumbullohet rreth organeve të brendshme dhe lidhet me rrezik më të lartë për sëmundje kardiovaskulare dhe metabolike. /Gazeta Shneta/