Një studim i ri sugjeron se nivelet e mjaftueshme të vitaminës C mund të luajnë një rol të rëndësishëm në ruajtjen e shëndetit të trurit gjatë plakjes. Studiuesit zbuluan se të moshuarit me nivele më të ulëta të vitaminës C në gjak kishin gjithashtu vëllim më të vogël të lëndës gri të trurit dhe lidhje më të dobëta mes rajoneve të rëndësishme nervore.
Studimi, i publikuar në revistën “PLOS One”, analizoi mostrat e gjakut dhe skanimet me rezonancë magnetike të rreth 2,000 japonezëve mbi moshën 64-vjeç. Shkencëtarët krahasuan nivelet e vitaminës C në plazmën e gjakut me strukturën dhe funksionimin e trurit, shkruan burimi Medical News Today transmeton Gazeta Shneta.
Rezultatet treguan se personat me nivele më të ulëta të vitaminës C kishin më pak lëndë gri – pjesa e trurit përgjegjëse për përpunimin e informacionit, kujtesën, lëvizjet dhe kontrollin e emocioneve. Ata gjithashtu shfaqnin lidhje më të dobëta në të ashtuquajturin “rrjet i modalitetit të parazgjedhur”, një sistem i rëndësishëm për kujtesën, reflektimin dhe funksionet njohëse.
Sipas studiuesve, vitamina C është një antioksidant i fuqishëm që ndihmon në mbrojtjen e qelizave nervore nga stresi oksidativ, një faktor i lidhur me plakjen e trurit dhe sëmundjet neurodegjenerative si Alzheimeri.
Megjithatë, autorët theksojnë se studimi tregon vetëm një lidhje dhe jo një marrëdhënie shkak-pasojë. Kjo do të thotë se nuk është vërtetuar ende se vitamina C parandalon drejtpërdrejt rënien njohëse ose humbjen e vëllimit të trurit.
Ekspertët këshillojnë që njerëzit të mos nxitojnë drejt suplementeve me doza të larta, por të fokusohen te një regjim ushqimor i shëndetshëm dhe i pasur me fruta dhe perime, burimet kryesore natyrore të vitaminës C.
Sipas tyre, ruajtja e niveleve optimale të kësaj vitamine mund të jetë një pjesë e rëndësishme e strategjisë për mbështetjen e shëndetit të trurit dhe funksioneve njohëse gjatë plakjes. /Gazeta Shneta/