Britania e Madhe po përballet me mungesat më të rënda të barnave të regjistruara ndonjëherë në sistemin publik shëndetësor, sipas farmacistëve dhe mjekëve familjar. Problemet me furnizimin po prekin një sërë medikamentesh të përdorura gjerësisht, duke përfshirë qetësuesit e dhimbjeve, ilaçet për epilepsinë, terapitë hormonale për menopauzën dhe preparatet e nevojshme për pacientët me sëmundje të rënda të pankreasit.
Shoqata Kombëtare e Farmacive në Britani paralajmëron se mungesat paraqesin një rrezik serioz për sigurinë e pacientëve, ndërsa Kolegji Mbretëror i Mjekëve të Përgjithshëm ka shprehur shqetësime për ndikimin që situata po ka te pacientët, farmacistët dhe mjekët, raporton The Guardian transmeton Gazeta Shneta.
Mungesat e këtyre barnave vazhdojnë prej më shumë se një viti e gjysmë deri në dy vjet, një rekord i ri për sistemin shëndetësor britanik.
Pasojat për pacientët janë të rënda. Disa janë detyruar të kursejnë dozat e ilaçeve, ndërsa të tjerë kanë reduktuar sasinë e ushqimit që konsumojnë për shkak të mungesës së trajtimit.
Sipas ekspertëve, konflikti në Lindjen e Mesme ka shtuar paqëndrueshmërinë e zinxhirëve të furnizimit, por nuk është shkaku i vetëm. Probleme të tjera përfshijnë mungesën e lëndëve të para, ndërprerjet në prodhim, buxhetin më të ulët britanik për barna krahasuar me disa vende europiane dhe rritjen e kërkesës për disa trajtime.
Farmacitë po hasin vështirësi edhe në sigurimin e barnave të zakonshme si Ramiprili për tensionin e lartë të gjakut, aspirina me dozë të ulët dhe co-codamol për trajtimin e dhimbjeve. Si pasojë, farmacistët kalojnë orë të tëra duke kërkuar furnizime alternative, ndërsa mjekët detyrohen të ndryshojnë recetat për t’iu përshtatur stokut të disponueshëm.
Kryetari i Shoqatës Kombëtare të Farmacive, Olivier Picard, tha se mungesat po bëhen më të shpeshta, zgjasin më shumë dhe po shkaktojnë shqetësime gjithnjë e më të mëdha. Ai kërkoi ndryshime ligjore që do t’u lejonin farmacive të zëvendësonin më lehtë barnat e munguar me alternativa të sigurta që gjenden në stok.
Nga ana tjetër, qeveria britanike deklaron se shumica dërrmuese e barnave të licencuara vazhdojnë të jenë të disponueshme dhe se po investohet në industrinë vendase të prodhimit farmaceutik për të forcuar furnizimin në të ardhmen.
/Gazeta Shneta/