Pagjumësia mund të ketë pasoja shumë më serioze se sa lodhja apo mungesa e përqendrimit. Një studim afatgjatë i Mayo Clinic në Shtetet e Bashkuara ka zbuluar se pagjumësia e vazhdueshme dëmton strukturën e trurit dhe mund të përshpejtojë proceset që çojnë drejt humbjes së kujtesës dhe demencës.
Studiuesit ndoqën për më shumë se pesë vjet 2,750 persona mbi 50 vjeç dhe zbuluan se individët me pagjumësi kronike kishin 40% më shumë rrezik të zhvillonin çrregullime njohëse, krahasuar me ata që flinin rregullisht, shkruan Mayo Clinic, transmeton Gazeta Shneta.
Skanimet e trurit treguan rritje të pllakave amiloide – tregues të hershëm të sëmundjes Alzheimer si dhe dëmtime të lëndës së bardhë, e cila është thelbësore për komunikimin midis qelizave nervore.
Sipas autorëve, mungesa e vazhdueshme e gjumit jo vetëm që ndikon në funksionin e kujtesës, por edhe plak trurin më shpejt. Në disa raste, ndryshimet e vëzhguara ishin të barasvlershme me rreth katër vite plakje të parakohshme. Megjithatë, lajmi pozitiv është se personat që përmirësuan cilësinë e gjumit, shfaqën më pak dëmtime dhe ruajtën më mirë aftësitë mendore.
Ekspertët theksojnë se gjumi është një faktor kyç dhe i modifikueshëm për shëndetin e trurit. Trajtimi më efektiv për pagjumësinë, sipas Mayo Clinic, është terapia njohëse-sjellore, e cila ndihmon në përmirësimin e gjumit në rreth 70% të pacientëve.
Shkencëtarët paralajmërojnë se ndërhyrja në moshë të mesme është thelbësore: përmirësimi i zakoneve të gjumit mund të ngadalësojë proceset neurodegjenerative dhe të mbrojë trurin nga dëmtimet që çojnë në demencë në moshat e mëvonshme. /Gazeta Shneta/