Komiteti i urgjencës rreth situatës pandemike të COVID-19, i Organizatës Botërore të Shëndetësisë u takua të enjten për të diskutuar nëse pandemia ende kërkon nivelin më të lartë të alarmit që mund të ketë agjensia shëndetësore e OKB-së.
Komiteti mblidhet çdo tre muaj për të diskutuar mbi pandeminë dhe raportohet më pas gjendja tek shefi ekzekutiv i OBSH-së Tedros Adhanom Ghebreyesus, shkruan Medical Xpress transmeton Gazeta Shneta.
Herën e fundit doli në përfundim se pandemia ende përbën një emergjencë të shëndetit publik me shqetësim ndërkombëtar – niveli më i lartë i alarmit të OBSH-së.
Komiteti kryesohet nga mjeku francez Didier Houssin dhe ka 18 anëtarë të tjerë si dhe 11 këshilltarë. Mes tjerash, ky komitet mblidhet për herë të 13-të që nga janari 2020.
“Është e qartë, ne jemi në një situatë shumë të ndryshme tani nga ajo ku ishim kur komiteti rekomandoi që unë të deklaroja një emergjencë të shëndetit publik me shqetësim ndërkombëtar më shumë se 33 muaj më parë,” tha Tedros në një konferencë për shtyp të mërkurën.
“Ne kemi të gjitha mjetet që na duhen për t’i dhënë fund emergjencës në çdo vend. Por pandemia nuk ka mbaruar dhe ka shumë punë për të bërë.
“OBSH do të informojë komitetin mbi situatën aktuale globalisht dhe do të paraqesë shqetësimet tona në lidhje me rreziqet e vazhdueshme për popullatën e botës, me boshllëqe të mëdha vaksinimi, mbikëqyrje të reduktuar, shkallë të ulët të testimit dhe sekuencës, dhe pasiguri në lidhje me ndikimin e mundshëm të varianteve”, tha ai.
Maria Van Kerkhove, drejtuesja teknike e OBSH-së për COVID-19, tha se virusi po qarkullonte ende në një “nivel tepër intensiv” në të gjithë botën.
Javën e kaluar u raportuan më shumë se tre milionë raste – një nënvlerësim pasi normat e testimit dhe raportimit kanë rënë.
Më shumë se 618 milionë raste të COVID dhe mbi 6.5 milionë vdekje janë raportuar deri më tani në OBSH. /Gazeta Shneta/