Paracetamoli është një nga qetësuesit e dhimbjeve më të përdorur në botë dhe shpesh merret për të lehtësuar shqetësime të përditshme si dhimbje koke, dhimbje shpine apo simptomat e ftohjes.
Shumë njerëz mbështeten në këtë ilaç pa recetë për shkak të efektivitetit të tij dhe faktit se zakonisht konsiderohet i sigurt kur përdoret sipas udhëzimeve.
Megjithatë, ashtu si çdo medikament tjetër, edhe paracetamoli mund të paraqesë rreziqe të caktuara për shëndetin nëse përdoret në mënyrë të papërshtatshme.
Autoritetet shëndetësore si NHS në Mbretërinë e Bashkuar, theksojnë se ky ilaç nuk është i përshtatshëm për të gjithë.
Në veçanti, personat që marrin rregullisht varfarin një medikament që përdoret për të parandaluar mpiksjen e gjakut – duhet të tregojnë kujdes të shtuar.
Para përdorimit të paracetamolit, këta pacientë këshillohen të konsultohen me mjekun e tyre, pasi kombinimi i shpeshtë i këtyre dy ilaçeve mund të rrisë rrezikun e gjakderdhjes. Megjithatë, përdorimi i dozave të ulëta të paracetamolit zakonisht konsiderohet i sigurt nëse bëhet nën mbikëqyrje mjekësore, raporton Express.co.uk transmeton Gazeta Shneta.
Ekspertët rekomandojnë që të merret gjithmonë doza më e vogël e mundshme që arrin të kontrollojë dhimbjen. Marrja e më shumë se katër tabletave prej 500 mg brenda 24 orëve për disa ditë radhazi mund të ndikojë në procesin e mpiksjes së gjakut, duke rritur rrezikun për gjakderdhje.
Një tjetër rrezik i rëndësishëm lidhet me kombinimin e paracetamolit me ilaçe të tjera që përmbajnë të njëjtin përbërës, si disa preparate për ftohje dhe grip ose medikamente si co-codamol. Në këto raste ekziston rreziku i mbidozimit, i cili mund të ketë pasoja serioze për shëndetin.
Prandaj, përpara përdorimit të paracetamolit veçanërisht nëse merrni ilaçe për epilepsinë, tuberkulozin ose trajtime të tjera është e rëndësishme të kërkoni këshillën e mjekut. Përdorimi i kujdesshëm dhe i informuar i këtij medikamenti ndihmon në përfitimin maksimal nga efektet e tij pa rrezikuar shëndetin. /Gazeta Shneta/