Pasuri të paluajtshme qindra mijëra euroshe, dhjetëra mijëra euro para të gatshme nëpër banka, disa prej tyre marrin më shumë se shtatë rroga në muaj. Lexoni më poshtë deklarimin e pasurisë së drejtorëve të administratës së Shërbimit Spitalor Klinik Universitar të Kosovës
Kryetari i Bordit të SHSKUK-së, Dr. Naser Ramadani, ka disa prona të paluajtshme bashkë me familjarët e tij ndërsa ka deklaruar vetëm një truall në emrin e tij personal. Ai dhe bashkëshortja e tij vozitin vetura të shtrenjta “Toyota”. Ramadani ka dhjetëra mijëra euro para të gatshme në banka, ndërsa ka deklaruar edhe disa borxhe dhe kredi, shkruan Gazeta Shneta.
Ramadani ka të ardhura mujore nga nëntë institucione të ndryshme, pesë prej tyre të shtetit, Instituti Kombëtar i Shëndetit Publik, SHSKUK, Universiteti i Prishtinës, Ministria e Shëndetësisë, dhe Agjencioni i Ushqimit dhe Veterinarisë.
Drejtori i Përgjithshëm i SHSKUK-së, Dr. Basri Sejdiu, ka të ardhura mujore nga pozita e tij dhe nga ordinanca private “Diagnostika invazive”. Sejdiu ka deklaruar katër prona të paluajtshme, dy prej të cilave janë në emrin e tij. Ai ka deklaruar tri vetura në pronësi të familjes së tij, 100 për qind aksione në ordinancën private dhe 5 për qind aksione të fëmijëve të tij në ordinancën e vëllait të tij “Dr. Shkodrani”.
Sejdiu ka para të gatshme në bankë 10 mijë euro, ndërsa ka deklaruar dy kredi të tij dhe një në emrin e gruas. Ai ka të ardhura mujore nga SHSKUK 1,126 euro, ndërsa nga “Diagnostika” merr 1600 euro në muaj.
Udhëheqësi i prokurimit të QKUK-së Gazmend Rushiti posedon 8 pasuri të paluajtshme, por të gjitha i ka deklaruar si pasuri e përbashkët. Rushiti ka deklaruar një traktor në vlerë 12 mijë euro dhe një veturë 5 mijë euroshe.
Rushiti ka deklaruar jo më shumë se 1720 euro para të gatshme në bankë, ndërsa të ardhura vjetore i ka deklaruar 9600 euro nga buxheti i Kosovës.
Një zyrtarë tjetër me shtatë rroga në muaj është Shefi i Njësisë për Buxhet dhe Financa të QKUK-së. Përveç pozitës së tij zyrtare, Sherif Bytyqi paguhet edhe nga 6 kompani private, 5 si kontabilist dhe një si profesor në Kolegjin AAB. Madje shefi i financave të QKUK-së ia mban kontabilitetin edhe një kompanie medicinale e cila përfiton tender nga shteti.
Bytyqi më të shtrenjtë e ka veturën sesa shtëpinë. Ai ka deklaruar banesë në vlerë 35 mijë euro dhe shtëpi në vlerë 20 mijë euro, ndërsa vetura i ka kushtuar 25 mijë euro.
Bytyqi nuk qëndron keq me para të gatshme në bankë. Ai ka deklaruar mbi 14 mijë euro kesh dhe disa mijëra euro tjera të bashkëshortes dhe fëmijëve. Më poshtë mund t’i shihni edhe shtatë rrogat mujore të Bytyqit.
Drejtori i Njësisë së Auditimit të Brendshëm në QKUK, Musa Vitija ka deklaruar një shtëpi në vlerë 70 mijë euro dhe tokë në vlerë 100 mijë euro. Ai vozitë veturë 8 mijë euroshe, ndërsa ka deklaruar 100 për qind aksione të fëmijëve në kompaninë “Pastërtia”. Vitija ka vetëm një pagë, atë të SHSKUK-së mbi 13 mijë euro në vit, ndërsa ka deklaruar edhe rreth 500 euro shtesa vjetore.
Visar Islamaj ka ardhur në pozitën e drejtorit të Shërbimeve të Përbashkëta. Ai ka deklaruar shtëpi në vlerë 80 mijë euro, veturë 10 mijë euroshe dhe 11 mijë euro para të gatshme në bankë.
Islamaj përveç pagës afër 12 mijë euro në vit në QKUK, ka deklaruar edhe një pagë 8640 euro në vit, por burimin e saj nuk e ka treguar. Ndërkaq krejt në fund ai ka deklaruar edhe 110,000 euro të fituara nga shpronësimi i autostradës në Prizren. /Gazeta Shneta/
