Patologu Nazim Qehaja është përfshirë në debatin për këngëtaren Fjolla Morina, për shkak të paraqitjes së saj para publikut në një koncert në Skenderaj.
Morina u bë shkaktare e debatit me veshjen e saj gjatë koncertit ku të pranishëm ndër të tjerë ishin edhe shumë fëmijë, shkruan Gazeta Shneta.
Në këtë debat është përfshirë edhe patologu Nazim Qehaja i cili me një deklaratë skandaloze ia ka gjetur “diagnozën” Morinës.
“Lexues të nderuar, vëllezër dhe motra! Ta komentojmë së bashku këtë foto, masë preventive, jo vetëm të turpit kombëtar por edhe të rrezikut të dhunimit me forcë të femrave të këtilla. Sipas mendimit tim, jo vetëm në aspektin human, por edhe në atë profesional, psikomjekësor, dhunuesit e femrave të këtilla, publikisht, skajshëm provokative, nuk duhet të përgjigjen para ligjit”, ka shkruar Qehaja në profilin e tij në Facebook.
Kjo deklaratë e tij ka shkaktuar reagime të shumta në rrjetet sociale. /Gazeta Shneta/
