Sipas një studimi të ri, lëngu i portokallit ofron përfitime të shumta për shëndetin e zemrës, duke ndikuar drejtpërdrejt në ekspresionin e gjeneve që lidhen me funksionet kardiovaskulare. Ky studim inovativ analizon efektet fiziologjike të lëngut të portokallit nga një këndvështrim molekular, duke ofruar një perspektivë të re mbi vlerën e tij për shëndetin e zemrës.
Hulumtimi, i publikuar në revistën “Molecular Nutrition & Food Research”, zbuloi se lëngu i portokallit ndikon gjerësisht në gjenet që rregullojnë aktivitetet fiziologjike të lidhura me zemrën. Mes tjerash, frenon proceset e padëshiruara dhe nxit ato që janë të dobishme për organizmin, shkruan burimi Medical News Today transmeton Gazeta Shneta.
Në mënyrë specifike, lëngu i portokallit ul aktivitetin e gjeneve që lidhen me hipertensionin (presionin e lartë të gjakut), një faktor rreziku kryesor për goditje në tru, infarkt dhe dështim të zemrës. Po ashtu, uli ekspresionin e gjeneve inflamatore, duke reduktuar inflamacionin sistemik që mund të dëmtojë enët e gjakut dhe të favorizojë formimin e pllakave të rrezikshme.
Njëkohësisht, lëngu i portokallit rriti aktivitetin e gjeneve përgjegjëse për metabolizmin e yndyrave, duke ndihmuar trupin t’i përpunojë dhe t’i ruajë ato në mënyrë më efikase.
Studimi identifikoi edhe efekte të ndryshme sipas tipit trupor: te personat me mbipeshë, metabolizmi i yndyrave u përmirësua ndjeshëm, ndërsa te individët me peshë normale u vu re një ulje më e madhe e inflamacionit sistemik.
Autorja kryesore e studimit, Layanne Nascimento Fraga, PhD, nga Universiteti i São Paulos, theksoi se përdorimi i qasjes transkriptomike lejoi analizimin e ndikimit të lëngut të portokallit në të gjithë sistemin metabolik. Sipas saj, u identifikuan 1,705 gjene të prekura, ku 98% e tyre u ulën në aktivitet, duke treguar një efekt të gjerë dhe pozitiv për shëndetin kardiometabolik. /Gazeta Shneta/