Lëngu i aloe verës, i përgatitur nga xheli i bimës dhe uji, promovohet shpesh si një mjet natyral për përmirësimin e shëndetit të aparatit tretës, veçanërisht për kapsllëkun dhe refluksin acid. Edhe pse nuk ka prova përfundimtare që përcaktojnë një orar ideal, konsumimi i tij në momente të caktuara të ditës mund të ndihmojë në arritjen e qëllimeve të ndryshme shëndetësore.
Për rregullimin e jashtëqitjes dhe lehtësimin e kapsllëkut, rekomandohet pirja e lëngut të aloe verës në mbrëmje, para gjumit. Kjo ndihmon që efekti laksativ të shfaqet në mëngjes, pasi aloe vera përmban përbërës aktivë si aloe-emodina dhe aloina, të cilët veprojnë pas rreth gjashtë orësh, shkruan burimi Very Well Health transmeton Gazeta Shneta.
Për qetësimin e irritimit gastrointestinal dhe simptomave të refluksit gastroezofageal (GERD), lëngu i aloe verës mund të konsumohet pak para vakteve. Në këtë mënyrë, ndihmon në mbrojtjen e stomakut dhe ezofagut, falë vetive të tij anti-inflamatore dhe antioksiduese.
Ndërkohë, për përfitime antioksiduese dhe anti-inflamatore më të mira, lëngu i aloe verës mund të pihet me ushqim ose pas vakteve. Studimet sugjerojnë se përbërësit e tij bioaktivë përthithen më mirë kur sistemi tretës është aktiv.
Sa i përket sasisë, duhet treguar kujdes. Konsumimi mbi 30–40 ml në ditë mund të shkaktojë efekte të forta laksative dhe probleme shëndetësore.
Rekomandohet ndjekja e udhëzimeve të produktit dhe përdorimi afatshkurtër.
Gjithashtu, është e rëndësishme të zgjidhen produkte të certifikuara dhe të ndërpritet përdorimi nëse shfaqen efekte anësore. Para përdorimit, këshillimi me një profesionist shëndetësor është i domosdoshëm, sidomos për persona me sëmundje ose që marrin medikamente. /Gazeta Shneta/