Një studim i ri sugjeron se përdorimi i teknologjisë nga të moshuarit mund të jetë po aq mbrojtës ndaj demencës sa ushtrimet fizike ose arsimi i lartë.
Studiuesit raportojnë se të moshuarit që zotërojnë aftësi dixhitale kanë më pak gjasa të përballen me dëmtime njohëse ndërsa plaken, duke treguar se teknologjia mund të ndihmojë në ruajtjen e funksioneve mendore, shkruan Euronews Health transmeton Gazeta Shneta.
Ky hulumtim, i botuar në revistën “Nature Human Behaviour”, përfshiu të dhëna nga 57 studime me më shumë se 411,000 persona mbi moshën 50 vjeç nga e gjithë bota, të gjithë me teste të funksioneve njohëse. Individët e moshës 68 vjeç u emërtuan si “pionierë dixhitalë”, pasi nuk kishin pasur qasje në internet gjatë fëmijërisë.
Analiza tregoi se të moshuarit që përdornin telefona inteligjentë, kompjuterë ose internet kishin një rrezik më të ulët për dëmtime njohëse sesa ata që i shmangnin pajisjet teknologjike. Gjatë ndjekjes disa vjeçare, përdoruesit e teknologjisë shfaqën gjithashtu më pak rënie në funksionet mendore.
Lidhja mes përdorimit të teknologjisë dhe shëndetit të trurit rezultoi të ishte po aq e fortë – madje më e fortë – se faktorë të tjerë mbrojtës ndaj demencës, si presioni i ulët i gjakut, ushtrimet fizike, arsimi i lartë dhe aktivitetet që stimulojnë mendjen.
Ky studim sugjeron se integrimi i teknologjisë në jetën e përditshme të të moshuarve mund të jetë një mjet i rëndësishëm për ruajtjen e shëndetit mendor dhe parandalimin e demencës. /Gazeta Shneta/