Tetë pasagjerët e fundit amerikanë që ndodheshin në karantinë pas shpërthimit të një virusi të rrallë në një anije turistike kanë lënë qendrën e izolimit në Nebraska, duke i dhënë fund një periudhe monitorimi që zgjati 42 ditë.
Shpërthimi i virusit hantavirus në anijen turistike holandeze MV Hondius shkaktoi vdekjen e tre personave dhe ngriti shqetësime ndërkombëtare për përhapjen e mundshme të sëmundjes.
Departamenti amerikan i Shëndetësisë konfirmoi të hënën përfundimin e karantinës, duke theksuar se bashkëpunimi ndërmjet institucioneve federale, shtetërore dhe lokale ndihmoi në menaxhimin e situatës pa raste të reja të sëmundjes tek personat e monitoruar.
Më shumë se 120 persona u evakuuan nga anija në Ishujt Kanarie të Spanjës muajin e kaluar, ndërsa 18 shtetas amerikanë u dërguan në Njësinë Kombëtare të Karantinës në Omaha. Asnjëri prej tyre nuk zhvilloi simptoma të sëmundjes gjatë periudhës së monitorimit.
Virusi që shkaktoi shpërthimin është identifikuar si Andes hantavirus, një variant i rrallë që zakonisht transmetohet përmes kontaktit me mbetjet e brejtësve të infektuar. Ekspertët thonë se ky lloj virusi mund të transmetohet edhe nga njeriu te njeriu në raste të rralla.
Në total, autoritetet identifikuan 13 raste të infektimit mes personave që ndodheshin në anije, ndërsa tre prej tyre humbën jetën. Viktimat përfshijnë një çift nga Holanda, të cilët dyshohet se janë ekspozuar fillimisht ndaj virusit gjatë një udhëtimi në Amerikën e Jugut.
Një nga pasagjeret amerikane, Angela Perryman, e cila ishte vendosur në karantinë me urdhër të detyrueshëm, e cilësoi izolimin gjashtëjavor si të panevojshëm dhe kritikoi mënyrën se si u menaxhua procesi.
Autoritetet shëndetësore argumentuan se periudha 42-ditore e monitorimit u vendos për shkak se në shpërthime të mëparshme simptomat e hantavirusit janë shfaqur edhe pas më shumë se një muaji nga ekspozimi.