Një studim i ri sugjeron se personat që preferojnë të flenë dhe të zgjohen vonë, të njohur shpesh si “bufët e natës”, mund të jenë më të prirur ndaj ankthit dhe ndjenjave të vetmisë krahasuar me ata që kanë një orar më të hershëm gjumi.
Studiuesit analizuan të dhënat e 442 pjesëmarrësve dhe vlerësuan kronotipin e tyre, pra prirjen natyrore të organizmit për kohën e gjumit dhe zgjimit. Pjesëmarrësit plotësuan gjithashtu pyetësorë për të matur nivelet e ankthit dhe ndjenjat e vetmisë, shkruan burimi Health Day transmeton Gazeta Shneta.
Rezultatet treguan se personat me orar më të vonshëm të gjumit raportuan nivele më të larta ankthi.
Sipas studiuesve, një pjesë e kësaj lidhjeje mund të shpjegohet nga vetmia që këta individë përjetojnë gjatë natës. Sa më e madhe të ishte ndjenja e vetmisë në orët e vona, aq më të larta rezultonin edhe nivelet e ankthit.
Ekspertët mendojnë se kjo mund të lidhet me faktin se “bufët e natës” shpesh kanë orare që nuk përputhen me aktivitetet sociale të familjes, miqve ose komunitetit. Si rezultat, ata mund të ndihen më të izoluar, veçanërisht gjatë mbrëmjes dhe natës.
Megjithatë, autorët theksojnë se gjetjet janë paraprake dhe ende nuk provojnë se gjumi i vonë shkakton drejtpërdrejt ankth apo vetmi. /Gazeta Shneta/