Sipas Organizatës Botërore të Shëndetësisë (OBSH), ushqimi i pasigurt shkakton çdo vit sëmundje te mbi 860 milionë njerëz dhe merr jetën e rreth 1.5 milionë personave në mbarë botën.
Me shprehjen “ushqim i pasigurt” nënkuptojmë ushqimin e kontaminuar me baktere, viruse ose parazitë, ushqimin e prishur apo të skaduar, ushqimin që nuk i plotëson kushtet higjieno-sanitare, ushqimin që përmban lëndë toksike ose kimike të dëmshme, si dhe ushqimin potencialisht të rrezikshëm për konsum.
Ushqimi i kontaminuar ose i trajtuar në mënyrë jo të duhur mbetet një nga sfidat më të mëdha të shëndetit publik, duke prekur veçanërisht fëmijët e vegjël, shkruan burimi Euronews Health transmeton Gazeta Shneta.
OBSH vlerëson se në vitin 2021 sëmundjet e transmetuara përmes ushqimit shkaktuan humbje ekonomike prej rreth 310 miliardë dollarësh për shkak të uljes së produktivitetit dhe kostove shëndetësore.
Shumë prej këtyre rasteve mund të parandalohen përmes përmirësimit të higjienës, sigurimit të ujit të pastër, praktikave të sigurta në përpunimin e ushqimit dhe qasjes më të mirë në kujdes shëndetësor.
Fëmijët nën moshën pesë vjeç janë grupi më i rrezikuar. Ata përballen me një rrezik trefish më të lartë krahasuar me të rriturit dhe përbëjnë pothuajse një të tretën e barrës globale të sëmundjeve që lidhen me ushqimin e pasigurt. Përveç infeksioneve, ekspozimi ndaj substancave kimike në ushqim mund të ndikojë negativisht në zhvillimin e trurit dhe të shkaktojë pasoja afatgjata.
Ndër shkaktarët më të zakonshëm të sëmundjeve ushqimore janë bakteret Campylobacter, Salmonella, STEC dhe Listeria, të cilat lidhen kryesisht me mishin e pagatuar mirë, vezët e papërpunuara, qumështin e papasterizuar dhe ushqimet e kontaminuara.
OBSH paralajmëron gjithashtu se ndryshimet klimatike mund të rrisin më tej rrezikun e këtyre sëmundjeve, duke e bërë sigurinë ushqimore një prioritet gjithnjë e më të rëndësishëm për shëndetin global. /Gazeta Shneta/