Një pilote praktikante 21-vjeçare nga Britania e Madhe vdiq pasi u pickua nga një mushkonjë në ballin e saj, sipas një seance hetimore.
Oriana Pepper nga Bury St Edmunds në Suffolk kishte zhvilluar një infeksion që u përhap në trurin e saj, kanë shkruar sot mediat britanike si The Independent përcjell Gazeta Shneta.
Pepper ishte në rrugën e saj për t’u bërë një pilote e linjës ajrore komerciale dhe kishte kaluar provimet e saj teorike në programin EasyJet në Oksford. Ajo kishte udhëtuar në Belgjikë për vlerësimet e saj të instrumenteve.
Në Antwerp të Belgjikës, pilotja Pepper u pickua nga një mushkonjë në ballin e saj. Ajo u shtrua në spital më 7 korrik të vitit të kaluar kur infeksioni u përhap në organizëm.
Mjeku ligjor i lartë i Suffolk, Dr. Nigel Parsley, tha të mërkurën se pilotja Pepper vdiq “si rezultat i një infeksioni serioz të shkaktuar nga një pickim insekti në ballë”.
“Një infeksion ka hyrë në lëkurën e Orianës pas një pickimi nga një insekt. Më pas është futur në arterien karotide të qafës dhe ka çuar në emboli septike në trurin e saj.”
“Unë kurrë nuk kam parë një rast si ky më parë,” tha mjeku ligjor.
“Është vetëm një nga ato gjëra që është një tragjedi kaq fatkeqe për një zonjë të re, e cila padyshim kishte një karrierë dhe jetë të mrekullueshme përpara saj.” /Gazeta Shneta/