Derisa krerët politik të institucioneve mburren me punën e tyre në shëndetësi, pacientët vazhdojnë të përballen me vështirësi të shumta. Një nga ta është detyruar të hyjë në kredi për të blerë barna për ta mbajtur gjallë babanë e shtrirë në intensivën e QKUK-së
Ministri i Shëndetësisë Uran Ismaili disa herë ka deklaruar para mediave se po e reformon sistemin shëndetësor në të mirë të qytetarëve. Madje ai ka thënë se me investimet dhe punët që po kryhen, po kursehen miliona euro nga xhepi i qytetarëve. Vetëm vitin e kaluar Ismaili ka thënë se ka ndaluar çmimet abuzuese të barnave duke kursyer miliona euro të buxhetit të shtetit dhe qytetarëve.
Në fakt shpenzimet e qytetarëve veç janë shtuar më shumë dhe fakt për këtë janë pacientët e shtrirë në intensivën e QKUK-së. Familjarët e tyre detyrohen të qëndrojnë para dyerve të intensivës, me frikën se mjekët mund t’iu kërkojnë të blejnë barna për shkak të mungesës.
Gazeta Shneta ka raportuar dje për njërin prej tyre se si është detyruar të marr kredi për të blerë barna për babanë. A.Z. ka treguar se ka shpenzuar rreth 1650 euro për barna.
“Kemi marr kredi për të mbuluar shpenzimet. Unë, nëna dhe motra ndaras kemi marr kredi të shpejtë në I*** Credit. Deri tash askush nuk na ka ndihmu. Po e kemi shumë të vështirë sepse përveç barnave kemi edhe shpenzimet të udhëtimit e ushqimit”, deklaron A.Z. teksa tregon dhjetëra receta dhe kuponë fiskal të barnatoreve të cilat i ka ruajtur të gjitha.
E lista e barnave dhe materialeve që mungojnë është e gjatë, nga barna jetike për pacientët e deri te kanila: 1. Noradrenaline; 2. Dopamine; 3. Dobutamine; 4. Fraxiparine; 5. Hydralazine; 6. Fresubine; 7. Bikarbonate; 8. Antibiotike: Tazocine, Colisitine; 9. Katetera aspiratave; 10. Kanila te traheostomes.
QKUK nuk ka dhënë asnjë sqarim në lidhje me këto mungesa dhe nuk ka kthyer përgjigje se kur do të furnizojnë pacientët. /Gazeta Shneta/
Familja merr kredi mbi 1600 euro për të blerë barna për pacientin e shtrirë në intensivën e QKUK-së