Policia e Kosovës pasi e ka shoqëruar dje gjinekologun Arsim Gashi, e ka dërguar në mbajtje me urdhër të prokurorit. Kështu ka njoftuar sot Policia me anë të një njoftimi për media.
“Prishtinë 10.05.2022 – 16:05. Është arrestuar i dyshuari mashkull kosovar pasi që ka shkuat në zyrën e viktimës femër kosovare (profesoreshë në fakultet) dhe e sulmuar fizikisht viktimën. Arsyeja e sulmit ndërlidhet me vlerësimin e “pa drejtë” në provim, që ka bërë viktima ndaj djalit të dyshuarit. Viktimës iu është ofruar trajtim mjekësor. Lidhur me rastin është konsultuar prokurori i shtetit me vendim të së cilit i dyshuari pas intervistimit është dërguar në mbajtje”, thuhet në njoftimin e Policisë.
Gashi e ka grushtuar dje profesoreshën Hatixhe Latifi-Pupovci, pasi kjo e fundit e kishte rrëzuar nga provimi djalin e tij.
Latifi-Pupovci ka deklaruar sot se asnjë dhunë nuk do ta sprapsë dhe asnjë student qofshin edhe fëmijët e kolegëve të saj, nuk do të marrin notë në lëndën e saj pa meritë.
Kujtojmë se Gashi është i njohur për Policinë pasi i njëjti ishte arrestuar edhe në vitin 2020 për një abort të jashtëligjshëm tek një vajzë 13-vjeçare e cila ishte dhunuar nga dy persona në Gjilan. /Gazeta Shneta/