Poliklinika “Bel Medic International D.O.O.” ishte hapur para tre vitesh në Graçanicë duke marr licencën nga Ministria e Shëndetësisë me dokumente të mjekëve shqiptar të cilët kishin konkurruar për punë në këtë institucion. Policia ka arrestuar pronarët Armend Aganin dhe Liljana Simic, ndërsa Inspektorati Shëndetësor ka mbyllur poliklinikën
Policia ka arrestuar dy nga pesë pronarët e poliklinikës “Bel Medic International D.O.O.”, Armend Aganin dhe Liljana Simic. Ata dyshohet se kanë keqpërdorur dokumentet e mjekëve shqiptarë të cilët kishin konkurruar për punë në konkurs në këtë institucion. Dokumentet nuk ua kishin kthyer kandidatëve dhe të njëjtat i kanë përdorur për të licencuar poliklinikën në MSH, shkruan Gazeta Shneta.
Arrestimin dhe mbylljen e klinikës e ka bërë të ditur dje Policia e Kosovës nëpërmjet një njoftimi. Agani dhe Simic janë arrestuar nën dyshim e bazuar se kanë kryer vepra penale ku përfshihen “Falsifikim i dokumentit zyrtar” neni 434, “Rastet e posaçme të falsifikimit të dokumenteve” nga neni 399, “Mashtrim” nga neni 335 dhe “Legalizim i përmbajtjes së rreme” nga neni 403 i KPRK-së.
“Të dyshuarit e potencuar lartë me iniciale dyshohet se kanë keqpërdorur dokumente, diploma etj., me qëllim që poliklinikën t’a Licencojnë në Ministrinë e Shëndetësisë”, thuhet në njoftimin e Policisë.
Pas zhvillimit të hetimeve, dyshimet janë vërtetuar dje pas realizimit të operacionit “Poliklinika”, ku Policia bashkë me Inspektoratin Shëndetësor kanë gjetur dokumentet të cilat i kanë sekuestruar si prova materiale. “Bel Medic” është mbyllur nga Inspektorati Shëndetësor. Dy të arrestuarit janë vendosur në mbajtje për 48 orë nga prokurori kujdestar. /Gazeta Shneta/